Auxilio pidi pa bario di Pos Chikito

ORANJESTAD - Un grupo di mucha cu ta varia entre 10 pa 15 aña di edad ta comete vandalismo riba casnan y despues ta rondona e victimanan cu menasa haciendo asina e bida den bario casi imposibel. Habitantenan di e bario ta sintiendo nan mes prizonero den nan propio cas. Como tal un cantidad di mayornan y otro habitantenan di e bario di Pos Chikito y vecindario a atende na e reunion yama, den cual a invita Minister di Husticia, Arthur Dowers hunto cu fiscalnan di Ministerio Publico y polis pa hunto combersa y atende e situacion reinante den bario na unda un grupo di mucha ta terorisa grandi y chikito pa varios luna caba.

BISIÑANAN DISGUSTA

Bisiñanan a conta autoridadnan hudicial durante e reunion cu nan ta bou di e impresion cu hopi di e muchanan aki ta wordo laga atras pa nan cuenta y ta conta cu supervision y guia di e hobennan mas grandi den e bario, cu na nan turno ta bende droga y ta hacido di malo. Ta hobennan cu ta cana arma y guia pa maldad. Lamentablemente e propio mayornan ta permiti of ta tolera esaki y ta biba di loke e muchanan aki ta horta for di e casnan den bario. Un di esunnan presente ta conta con un ciudadano a wordo horta precisamente 16 biaha den su propio cas.

GANGNAN HOBEN

“Ta trata aki di gangnan di alrededor di 30 mucha cu ta biba den automatismo, dor cu no tin ningun hende cu por para nan. Nos ta pidi un opvangcentrum y ayudo di instancianan pa kita e muchanan aki for di nan mayornan y trata di salba loke por salba ainda di nan caracter”, un ciudadano a expresa. Na final e mandatario di husticia a manda un mensahe pa tur hende den e barrio: “Educa bo yiu, sino nos lo eduk’e pa bo!”