Hof a pospone parti di tratamento di caso di ex minister Croes den Ibis pa aki tres siman

ORANJESTAD – Hof diaranson atardi a pospone parti di tratamento di caso di Paul Croes den Ibis te aki tres siman. Esaki a keda dicidi pa warda un rapport financiero relaciona cu e aspecto financiero y di labamento di placa di tanto Paul Croes y su casa Melony. Hof lo trata e parti ey dia 21 di september awor, y despues lo determina un fecha nobo pa dicta sentencia tres siman despues. Mientrastanto e tratamento di e caso a sigui awe mainta pa loke ta e defensa di ex minister Paul Croes. Entre nan, abogado di sr Croes, Demis Illis a entrega un mapa cu splicacion financiero. Hof y PG a cuestiona e hecho cu pakico a entrega esaki asina laat. Mr Illis a splica den corte cu ta henter un investigacion expertonan accountant a haci pa demonstra entradanan di su clientenan Paul y Melony. El a bisa cu expertonan tabata presente den sala di Corte tambe. Hof a bisa cu e ta pospone e caso un rato pa evalua esey. A dura basta rato prome cu Hof a presenta y president di Hof a bisa cu aunke cu e rapport a wordo entrega laat, y e contenido caminda PG a reclama cu tin informacionan cu e no ta na altura di dje, e kier duna PG e chens pa investiga esaki. Lo haci e parti di Paul so y wanta e parti di Melony pa laga PG investiga, y tambe di parti di defensa lo por haci su parti. Kier a pospone esaki e ora pa 21 di September ora cu Hof ta na Aruba. E tabata kier e reaccion di PG riba rapport y reaccion di abogado riba esaki. 

COSNAN A BAY ROBEZSegun abogado di e ex mandatario, desde comienso y te na final di e investigacion contra Paul Croes como minister, tabatin cosnan a sosode cu no por permiti. A usa aparatonan pa scucha combersacionan, a bay haci investigacion na cas cu a spanta e yiunan cu a keda afecta. E ta cuestiona e hecho cu fiscal tabata haci investigacion siendo cu segun ley, ora cu ta trata di un investigacion contra un minister, ta PG mester haci esaki. Y ningun caminda, segun e abogado, no tin autorisacion di PG na e fiscal pa haci esaki. Y segun e abogado, ta fiscal tabata actua siendo cu esey no por a base di ley. 

MALVERSACION Y LABAMENTO DI PLACA

Pa loke ta e tema di malversacion y labamento di placa, segun abogado Illis, Ministerio Publico kier mustra cu ta un negoshi grandi tabatin cu dispensacion di permiso, locual no ta e caso. E abogado ta sigui bisa cu Ministerio Publico kier pretende cu tur e entradanan tabata basa riba pagamento di dispensacion, siendo cu no ta asina. Tabatin un cantidad di eventonan cu a tuma lugar pa asina genera entrada, e abogado a sigui splica. A haci mencion e ora di entre otro Campeonato di bowling y concierto di pasco. Esaki tabata shownan unda cu artistanan conoci tabata presenta. Tabata bende carchi na razon di 100 dollar. E ta admiti cu celebtracion di cumpleaños di Paul Croes tabata wordo haci na grandi, caminda ta haya donacion. Partido tabata exigi di politiconan pa percupra pa donacionan di comerciantenan. Sea e donacion ta den forma di placa of alcohol of otro cosnan. E abogado e ora a menciona e caso penal contra Otmar Oduber na 2008 riba donacionan cu e tabata haya y cu mester tin un claridad unda tabata haya e placa. E ta mustra cu Oduber a wordo declara liber y te ainda e donacionan ta sigui tuma lugar. Politiconan ta organisa evento=nan pa yega na placa pa hiba campaña. Segun e abogado, no tin un ley cu ta mustra con un politico mester yega na placa pa hiba campaña. 

Segun e abogado, ta acusa su clientenan di labamento di placa. E ta haya cu a base di accountant, tin fayo den e investigacion financiero cu tin consecuencia den e caso di Paul y Melony. Un expert accountant cu tabata den sala, a splica un que otro tocante con den e investigacion financiero a haci fayo den calculacion di sumanan. El a bisa cu tin codenan di banco cu ta demonstra oral anta oplaca. Ministerio Publico ta mustra cu a lanta 10 mil florin, pero en realidad e ta 6 mil florin. Esey ta un caso so, segun e abogado, sin papia di henter e periodo di 2014 pa 2017.DETENCION CU LIMITACION SERIO

Un otro punto cu e abogado di sr Croes a cuestiona, ta forma con su cliente a keda deteni pa asina hopi dia den condicionan no humano. Segun e abogado, Ministerio Publico a limita comunicacion di su cliente durante 80 dia cu su famia y tur otro hende. Esaki, segun e abogado, a afecta e ex mandatario masha hopi. E la wordo hopi isola den seccion di hendenan cu problema mental y cu a mata hende. E tabata keda cera 22 ora pa dia den su cel su so y pa algun ora so por a tuma aire liber. Su so den cel, sin buki, sin nada pa distrai su mente den e seccion di IBA. Esaki a afecta e cliente di tal forma cu e ta hayando tratamento psycologico. Por a mira e cliente tabata cabez abou ta yora den su cel. E por a tende otro detenidonan ta grita den e otro celnan. E abogado ta haya cu a viola derecho humano di su cliente, y ta cuestiona e forma inhusto di actua di Fiscal, door di ordena pa Paul Croes keda cera den e cel sin por papia cu niun hende. E la haci e pregunta na Hof, con por cera un persona cu ta mentalmente bon, den seccion di hendenan cu tin problema mental. “Bo no por cera hende den secccion cu no ta cuadra pa nan”. Tabatin 76 dia cu e tabta cera den un cel chikito den seccion di hende cu problema mental, e abogado a sigui bisa. Y en total 80 dia den isolacion, sin bijbel, yen di sangura, cacalaca y djaka ta pasa den cel. E abogado a sigui conta cu na dado momento un empleado a haya cu e ta dimas y a laga Paul sigui lesnan di Bijbel. A splica cu e ex mandatario tabata banda di e cel di e detenido Lampe, cu a cera pasobra el a mata su famia completo y kima nan. A mustra tambe riba e caso di ex minister Benny Sevinger, tambe un politico deteni y cera den KIA, pero cu no tabata isola manera su cliente Paul. A para e caso e ora y pospone e tratamento, relaciona cu e parti financiero. No a papia di e acusacion di labamento di placa, y tampoco Melony door di e rapport cu e abogado Illis a presenta. Esaki ta sigui awor dia 21 di september. A compronde cu e dia ey ta e dia importante, y despues lo fiha un fecha pa bin cu e sentencia.