Wever: Decision di SKOA un dia prome cu apertura pa tene scolnan cera, ta incomprendibel

ORANJESTAD – “Gobierno ta lamenta cu SKOA ta warda te na ultimo momento, hustamente durante conferencia di prensa di Gobierno, pa anuncia cu no ta habri scol”. Asina e prome mandatario demisionario di Aruba Evelyn Wever Croes a bisa na nomber di gobierno den su prome reaccion awe riba e tema aki na noticiacla diaranson riba e situacion cu a surgi unda cu tin 46 scol cu no ta habri ainda debi cu tin un problema cu asunto di trahadonan di limpiesa di SKOA. 

RELACION ENTRE SKOA Y GOBIERNO

Segun e mandatario, e relacion entre SKOA y Gobierno tabata semper uno bon y habri, cu excepcion di e relacion entre SKOA y minister Lampe.  E ta sigura cu ta abase di e bon relacion ey a logra soluciona varios problema den pasado. “Pa Gobierno ta keda incomprendible, despues di e pidi SKOA warda pa e gobierno nobo forma, pa e minister nobo atende cu e problema, algun ora prome cu apertura di aña escolar, nan ta tuma un decision asina incomprendible perhudicando miles di muchanan” e mandatario a sigui bisa. “ Ainda no tin gobierno nobo, ni minister nobo, lo ta hopi lamentable si SKOA scohe toch pa tene scolnan sera, sin motibo” e mandatario a finalisa bisando. 

SKOA

Tabata awe mainta cu e directora di SKOA, Anuesca Baly a bisa e portal aki den forma di primicia, cu ‘Tanten cu Stichting Katholiek Onderwijs Aruba (SKOA) no haya un garantstelling cu e trahadonan di limpiesa di e fundacion lo wordo paga, e 46 scolnan cu ta cay bou di e fundacion lo keda cera te proximo aviso”.