Pontilius: Manda e problema di SKOA bek pa minister Lampe, no ta resolve e problema

ORANJESTAD – “Cu tur respet: pa manda bek manera minister president a bisa pa manda esaki bek pa minister Rudy Lampe, (e problema) no ta wordo resolve”. Esey tabata reaccion di mediado di gobierno Anselmo Pontilius diaranson na noticiacla riba e impasse cu tin cu SKOA pa cual awe 46 scol no a habri riba prome dia di aña escolar. E mediado ta haya cu “ta evidente cu conseho di minister mester bin hunto pa resolve e asunto di trahadonan di limpiesa”. 

PROBLEMA BIEU

Segun Pontilius, e ta un problema cu ta bay añanan bek, y unda cu e trahadonan di limpiesa no ta culpable den e situacion aki. “Y den un situacion manera esaki, nos no por bay busca ken ta culpable” e mediador a sigui bisa. E ta compronde cu erornan a wordo cometi, pero e hecho ta cu tur minister, inclusive sr Rudy Lampe, ta di acuerdo cu no por sigui cu e desigualdad pa e trahadonan di limpiesa aki. Como ehempel, e la compara e trahadonan di limpiesa cu ta traha pa DPS, si ta goza di tur beneficio cual a wordo regla na 2016. “E hecho cu un texto of parti di un texto di e decision di ministernan di 2016 no ta corecto, no ta hustifica cu nos ta bay hinca y trata e trahadonan di e forma aki” sr Pontilius a sigui bisa. 

RESOLVE E PROBLEMAE mediado di gobierno ta haya cu e problema aki mester wordo regla elegantemente na nivel di ministerraad. “Y si no ta asina, anto mi ta kere cu lidernan di fraccion mester yama e ministernan hunto pa duna aprobacion pa por lo menos e suma di placa cu nos ta papiando di dje, wordo acorda, aunke cu tin un gobierno demisionario. Cosnan tin cu sigui!”. E ta recorda con un otro minister demisionario corectamente a bay Staten pa pidi placa pa cumpra material pa bombero. “E situacion di SKOA ta mes of mas urgente cu e situacion na brandweer”, e mediador a sigui bisa. E suma di e debe ta di 5 miyon florin cu na e momento aki ta riba lomba di SKOA, pasobra nan no a haya e suma pa cumpli cu nan responsabilidadnan, manera pensioen y e otro asuntonan.