Baly: Pa scolnan di SKOA habri, mester haya garantia cu ta paga trahadonan di limpiesa

ORANJESTAD – Tanten cu Stichting Katholiek Onderwijs Aruba (SKOA) no haya un garantstelling cu e trahadonan di limpiesa di e fundacion lo wordo paga, e 46 scolnan cu ta cay bou di e fundacion lo keda cera te proximo aviso. Asina directora di SKOA, sra Anuesca Baly a bisa noticiacla den un entrevista live diaranson mainta. Esaki ta nifica cu awe tin un total di 9500 alumno cu no a bay scol awe. Segun sra Baly, asina cu e fundacion haya e garantia di gobierno di loke a palabra, lo habri e scol. Pero te cu awe mainta, no a haya tende nada ainda y mientrastanto e scolnan aki ta keda cera. SKOA tin 15 kleuterschool, 25 basis school, 1 scol special y 5 scol secundario MAVO. 

E SITUACION

Segun sra Baly, ta for di 2020 ta trahando riba e asunto aki di e trahadonan di limpiesa cu no por wordo paga debi cu no tin suficiente placa. Esaki siendo cu tin un palabracion haci, cu aprobacion di ministerraad cu mester soluciona e asunto aki. Ta berdad cu a bisa cu mester ahusta e proposicion, pero cu sikiera un punto por aproba caba pa asina e scolnan por habri. E proposicion y e acuerdo aki a cana segun Baly, via mediador di gobierno, cu a keda firma pa mediador di gobierno, sindicato SEPPA y minister di Labor. E acuerdo aki a keda acorda den conseho di minister, pero despues e la tranca. Un di e posibilidadnan ta cu formacion di gobierno tin e asunto pega. 

SORPRENDI

Sra Baly a keda sorprendi di tende prome minister Evelyn Wever bisa dialuna anochi cu e ta un asunto cu solamente minister di Enseñansa por regla, siendo cu a palabra otro y cu esey tabata un ‘gepasseerd station’. Como tal no ta compronde cu e mandatario a bisa loke e la bisa, unda cu ta mustra cu e prome mandatario ta manda e asunto bek pa e minister di enseñansa mientras cu tin un acuerdo cu prome minister caba.  

COMPRENSION

E directora ta compronde e frustracion y rabia cu por tin cu e scolnan ta cera, pero ta haciendo esaki netamente pa salud di e muchanan. Si habri scol sin e limpiesa, y e scol bira un ‘superspreader’ di Covid19, danki na e variante Delta, e ora tambe SKOA lo haya su mes mal sirbi. Como tal, a opta pa ta safe y no habri scol tanten cu no tin trahado di limpiesa pa haci e trabou aki. 

DIFERENCIA CU OTRO SCOLNAN

E diferencia cu otro scolnan si por a habri, y no tin problema cu trahadonan di limpiesa, segun sra Baly, ta facil pa splica. E problema ta placa unda cu e scolnan cu tin otro fundacion, e gastonan pa e mayornan ta mucho mas halto unda cu ta paga centenares mas pa cada mucha, pa asina cubri tur e gastonan extra di e scol. Algo cu no ta sosode na e scolnan di SKOA. Aki ta subsidio nan ta haya di gobierno y asina por mantene e gastonan pa cada alumno y mayor abou, pa asina nan por bay scol. Esey ta e diferencia pues, pakico otro scolnan si por a habri y esunan di SKOA no.