SKOA ta tene tur su scolnan cera diaranson ‘te proximo aviso’

ORANJESTAD – Mientras cu oficialmente scol ta habri diaranson na Aruba, tur scol cu ta cay bou di Stichting Katholieke Onderwijs Aruba (SKOA) ta keda cera. E directora di SKOA Anuesca Baly a confirma esaki diamars anochi pa noticiacla, y a sigura cu mas laat lo a sali un comunicado mas directo riba e tema. Pero ya tur scol cu ta miembro, a pone nan carta riba e pagina di Facebook di SKOA, anunciando cu nan lo keda cera ‘te proximo aviso’. E problema ta e situacion di e trahadonan di limpiesa cu tin unda cu no por garantisa nan seguridad y cu sin nan trabou, no ta responsabel pa tene scolnan habri. Sigur no awor mirando e situacion di Covid19. Como tal a reuni diamars y a dicidi cu tur scol, incluyendo kleuter, basis y MAVO cu ta resorta bou di SKOA, ta keda cera. E empleadonan di e scol si lo ta presente, pero no e alumnonan. 

GOBIERNO

Durante e conferencia di prensa diamars anochi di Covid19, prome minister Evelyn Wever Croes a bisa cu e ta compronde e situacion y e situacion ta uno cu e minister demisionario di ensenjansa Rudy Lampe tin cu atende awor. E ta e unico cu por haci esaki, y e ta spera cu e asunto aki lo keda resolvi di un manera di adulto y pa e alumnonan no keda mas perhudica ainda. E scolnan tabata cera caba pa dos siman debi cu tabatin medida di Covid19.