PG den Corte: Paul Croes a actua corupto y tabatin un grupo cu tabata traha cun’e

ORANJESTAD - Awe merdia a continua tratamento di e caso di apelacion Ibis unda cu e biaha aki Ministerio Publico a presenta su rekisitorio, esta kico ta su demanda pa e sospechosonan. Aki Procurador General a papia y bisa cu Ibis ta un caso serio y cu e ta haya cu mester haya Paul Croes culpable. Tambe el a bisa cu e tin un impression di algun di e sospechosonan durante tratamento di e caso. El a mustra tambe riba e impacto di e caso Ibis pa cu comunidad di Aruba. Den e caso ta envolvi 30 persona. Paul Croes a actua corupto y tabatin un grupo cu tabata traha cun’e. A investiga su casa Melony Paesch pa cu labamento di placa di su negoshi. Tambe a mustra cu DPL no por a haci su trabou bon pasobra e ex minister e tempo ey tabata tuma e decisionan. Dimas no por a sigui su maneho tampoco, pasobra aki tambe e ex minister tabata meti. E PG a sigui bisa cu Croes tabata responsabel pa maneho di labor y a viola e maneho aki. Den constitucion ta para kico un minister por y no por haci, segun e PG. E PG a recorda cu e ex mandatario a huramenta dilanti Gobernador cu e lo no tuma nada di regaslo for di hende pa fabor. Pero, e ex mandatario a laga su mes wordo cumpra na gran escala, esta segun e PG. 

CASO

A sigui bisa cu tin 11 caso caminda  tin prueba cu companianan a paga of duna regalo na e ex mandatario pa asina regla permiso of dispensacion pa asina hende di exterior traha na Aruba. DPL tabata hiba maneho pa percura pa nos hendenan local tin trabou, y pa haya di exterior, mester haci peticion. Segun PG, Croes (e ex mandatario:red) tabata haya placa di tramitadornan, kendenan tabata regla perjmiso pa esnan di exterior. Nan tabata cobra y paga Paul Croes. Croes a lanta un fundacion Excellence y tabata haya donacion di hendenan cu mester di permiso. Y e ex mandatario tabata usa esaki como vehiculo pa esnan cu kier permiso of dispensacion pa trahador for di exterior. 

SUPERMERCADONAN

A haci mencion di supermercadonan Chines cu a haci peticion di permisonan. E ex mandatario, segun OM, a bay na e supermercadonan pa haya bebida. Paul a dispensa permisonan cu DPL a desaproba. Tin te hasta combersacionan scucha, caminda por scucha e ex mandatario ta papia cu comerciantenan pa sea placa of bebidanan alcoholic y ta priminti nan di regla permiso pa stranheronan. Un tal Simon cu tabata traha pa Chinesnan, a declara   cu e tabata yama Paul pa regla permisonan y e ta percura pa e Chinesnan duna cahanan di alcohol y placa pa Paul su campaña. 

DI VECCHIA

Segun e caso ta sigui, OM a bisa cu e sospechoso Di Vecchia a cumpra Croes door di ofrece airco. Den prome instancia el a wordo declara liberl pero PG ta haye culpable. Ta mustra cu Di Vecchia mes a papi cu e tin ingeniero technico di exterior cu mester haya permiso. A haya cu e combersacion entre e ex mandatario y di Vecchia ta mustra cu e papiamento tocante airco, ta relaciona cu permiso pa e ingeniero technico.