7 fayecido di Covid19: 5 na Colombia y 2 na Aruba den un siman!

ORANJESTAD - Segun resumen di awe a registra un total di 7 morto mas, di cual 5 tabata na Colombia y 2 na Aruba den curso di un siman di tempo. Y tin un total di 67 caso nobo di COVID-19 a keda registra cual 4 ta no-residente y 63 ta residente y32 persona a recupera. E cifranan aki ta representa un 'Positivity rate' bou di nos residentenan di 22%. E cantidad di casonan activo di COVID-19 pa awe ta 590 y cantidad di fayecidonan relaciona cu COVID-19 a aumenta na 146 cu fayecimento di 7 residente. Di e 7 fayecidonan 5 a fayece na Colombia durante siman pasa y 2 a fayece na Aruba di cual uno na hospital y uno a wordo confirma cu Covid-19 despues di morto. Palabra di forsa na famia di tur e fayecidonan. Datos di COVID ta ilustra casonan nobo cu un average semanal di 60 caso pa dia y un average di 'positivity rate' semanal di 25% pa dia.

HOSPITAL

Actualmente na Aruba tin 57 persona interna debi na COVID di cual 15 ta den ICU y 42 riba piso general y na Colombia tin actualmente 16 persona den Cuido Intensivo.

DATOS

For di comienso di juli cu DELTA a haci su introduccion na Aruba por observa cu lamentablemente 39 persona na Aruba a perde e bataya contra e virus di COVID-19 di cual 6 tawata vacuna y 33 no tawata vacuna. Den e grafico adhunto por observa tambe con e variante Delta a percura pa un cantidad di morto record compara cu data for di maart 2020.