Corte a cuestiona maneho di placa di ex minister Croes y su casa

ORANJESTAD – Awe mainta a sigui cu e tratamento di e apelacion di caso Ibis den Corte. Awe a atende e parti di malversacion di e ex minister Paul Croes na su fundacion Excellence. Abogado Demis Illis a presenta documentonan y esey a pone cu ayera a pospone pa sigui awe cu e tratamento di e tema ey. 

INVESTIGACIONAN 

A resulta cu ta investigacionan cu a haci pa mustra con a yega na placanan di casamento caminda hendenan a duna regalo na cantidad di placa y cos. Hof a mustra cu despues di 2 aña y mei ta mira cu a haci investigacionan y a puntra pakico a haci esaki asina laat. Segun e ex mandatario, den e caso di Prome Instancia, no a haya suficiente tempo pa haci esaki. E la splica cu awor a pidi famia pa ayudo financiero pa asina por a laga haci e investigacionan aki pasobra e ta un trabou costoso. Hof a sigui remarca cu por mira cu tin cantidad di gastonan di restaurant cu a wordo inclui. A puntra e ora si esaki tambe ta forma parti di e campaña politico. E ex mandatario a splica e ora cu ta su accountant a haya cu esakinan tur tabata forma parti di e gastonan di representacion. Hof a puntra e ora con e accountant por sa cu esakinan ta gastonan di representacion. E ex mandatario a mustra cu a base di e ponencia di Ministerio Publico cu ta bisa cu a malversa na e restaurantnan, a dicidi pa haci esaki. E la splica cu na restaurantnan tabata reuni cu hendenan ariba con ta hiba campaña. E la bisa cu e presidente di e fundacion Excellence, esta sr Capriles a dicidi cu tur esakinan ta cay bou di gastonan di representacion. Ademas, el a bisa cu Capriles a wordo forza door di LandsRecherche y palabra tabata wordo poni den su boca, pa perhudica Paul. El a bisa cu e tabata sa cu el a haci hopi gasto y tabata duna varios recibo na Capriles.