Casa di ex minister Croes ta acusa fiscal di a bully nan masha hopi

ORANJESTAD – Procurador General Bote ter Stege diamars merdia a dedica tempo tambe riba e casa di ex minister Paul Croes den corte diamars merdia den e apelacion di Ibis. Den e parti di e casa di e ex mandatario, esta Melony Paesch, Hof a mustra cu Ministerio Publico a haci investigacion financiero riba e negoshi di e casa. A haci mencion di e suma di 209 mil florin y tabatin mas. Pero investigacion a mustra cu cosnan no tabata cuadra. Melony a splica e ora cu e no sa nada di accountancy y pesey e tin compania ta haci esey p’e. Melony a sigui bisa Hof cu fiscal Gerretschen a bully nan masha hopi. A laga interoga un empleado cu a splica bon cla con henter e opreacion di compania tabata bay y diripiente e declaracionan aki no tabata existi. E empleado a splica cu tur dia nan tabata hiba recibo pa e accountant. El a bisa cu Fiscal na final a bisa cu no tin nada contra Melony. Hof a mustra sinembargo cu e investigacion financiero di e accountant di Melony ta diferente di loke Landsrecherche a haci. Melony a para ariba cu no tin nada malo cu su negoshi, manera cu Ministerio Publico ta pretende. E caso ta sigui.

TRAHADOR ILEGAL

Melony a splica den e caso di trahado illegal cu a wordo haya na nan cas dia di e huiszoeking inicial, kico tabata e caso. Segun e casa di e ex mandatario, e no tabata confia hende cu su yiunan. E tabata busca hende pa wak pa su yiunan, pero no a haya hende adecua. Su amistadnan a yuda pero asina mes e no por a haya. Pesey a busca un persona for di Venezuela, pa mira si e ta adecuado. E situacion, segun e casa, e momento ey a pone cu e la haci asina y ta pidi disculpa pa esey. E la bisa cu e tabata hopi ocupa cu trabou. Y el a bisa tambe cu e kier tabatin su propio plca y no tabata depende di placa di su casa y cu esey ta su forma di ta. Ademas el a bisa Hof cu Paul tin su salario, y e tabata kier tin su propio placa.