Corsou kier aclaracion di Venezuela riba ‘expansion area di defensa’

WILLEMSTAD – Gobierno di Corsou kier un aclaracion di Venezuela. E supuesto declaracion di presidente bisiña Venezuela, - e supuesto expande su tereno di defensa te cu St Maarten, incluyendo Corsou- , gobierno di Corsou no ta tuma. Mes momento e gobierno ta laga sa cu nan ta duna hopi balor den un ‘bon bisiña’, pero mes momento ta sigura cu lo haci tur cos posibel pa hunto cu e partnernan di Reino, cuida e soberania di Reino, incluyendo Corsou.

ACLARACION

Como tal Corsou, -segun e matutino Antilaans Dagblad-, (lesa e articulo aki) a pidi pa aclaracion via e canalnan diplomatico. Gobierno di Corsou a sigura cu e relacionnan actual diplomatico ta excelente cu Venezuela. Segun e gobierno, tin un comunicacion ‘habri’ entre e dos paisnan. Consulado venezolano na Corsou a laga sa cu e ta sostene su presidente. E declaracion recien di Maduro, (cu mientrastanto ta parse di ta uno saca for di contexto) a crea basta conmocion. Segun e consulado na Corsou, gruponan extremista na Venezuela ta haciendo tur posibel pa destabilisa e pais.

PAIS

Partner di coalicion, Alex Rosaria di partido PAIS, a bisa di ta precupa y sorprendi pa e declaracionnan di e presidente. Segun Rosaria, e por trece e democracia di Corsou den peliger. For di 2014, gobierno di Corsou a implementa un taskforce special di Venezuela, cu ta reuni continuamente. E ta consisti di departamentonan di gobierno, cu ta conseha gobierno di un forma pro activo riba e desaroyo y areanan di importancia entre Corsou y Venezuela.

TUMULTOSO

Venezuela un biaha mas ta pasando den temponan tumultoso. Diahuebs ultimo e alcalde di Caracas Antonio Ledesma a wordo deteni, riba sospecho di a prepara e ultimo intento di golpi di estado di e pais. Agentenan ‘secreto’ a detene e politico den su oficina na Caracas. E tension entre e oposicion y e gobierno socialista ta halto.