Paul Croes den Corte: Donacionan ricibi no tabata pa permiso of dispensacion

ORANJESTAD – Awe mainta e tres hueznan den caso di apelacion di Ibis, a trata e.o. e cumpramento di sr Paul Croes (soborno) door di comerciantenan, durante e tempo cu Croes tabata minister. Segun sr Croes den corte awe mainta, nunca el a pidi placa pa regla dispensacion of pa permiso pa hendenan. Segun sr Croes, ta intepretando e asunto aki robez. Segun Croes, esaki ta unicamente pa campaña politico y no tin nada di haci cu dispensacion of dunamento pa permiso, pues e placanan cu el a haya. Sinembargo, huez a bisa sr Croes cu tin comerciantenan cu a bisa cu nan a hacie (paga Croes) pa nan haya permiso of dispensacion. 

CAHA DI CERBEZ

Sr Croes a bisa tambe awe mainta cu e pidimento di caha di cerbez of placa di ticket pa concierto no tin nada di haci cu dunamento di permiso, sino a ripiti cu esaki tabata pa su campaña politico. E ta haya cu e declaracionan haci tabata na un forma inhusto pa asina perhudik’e. Dado momento sr Croes a bira emociona y a bisa cu e kier bisa hopi cos pasobra awor ta su oportunidad den e caso di apelacion. El a bisa cu ta interpreta robez ora cu el a pidi comerciante caha di cerbez pa concierto di partido, y cu hende ta haci cu esaki ta pa permiso. Huez aki a cuestiona sr Croes, puntrando e con por interpreta algo asina robez. 

ACERCA 13 NEGOSHI

Sr Croes a sigui bisa cu el a acerca 13 negoshi pa cumpra ticket pa e concierto di partido. E ticket ta costa 100 dollar y e kier sa con ta pinta esaki cu dunamento di permiso. Tambe el a sigui bisa cu ta 90 negoshi a haya permiso pa hendenan di exterior. No manera cu Ministerio Publico ta pinta cosnan cu e lo tabata presiona comerciante pa cumpra ticket of haci donacion  y asina lo duna dispensacion. E ta sigui bisa cu hopi negoshi a cumpra ticket den pasado prome cu e tabata te hasta minister. E caso ta siguiendo den corte. Keda pendiente pa actualisacion durante curso di dia