Venezuela a pidi Hulanda pa prohibi avionnan 'Tucano' uza nos aeropuerto

CARACAS/ORANJESTAD – Venezuela a pidi Aruba y Corsou (via Hulanda) cooperacion pa evita cu avionnan tipo Embraer Tucano por lanta buelo for di nos aeropuertonan y sali rumbo pa Venezuela. E presidente di e pais bisiña, Nicolas Maduro a informa esaki recientemente durante un discurso nacional (mira e discurso aki) relaciona cu e reciente intento di golpi di estado contra su gobierno. Segun Maduro, tabata tipo di avionnan asina cu lo mester a wordo uza siman pasa pa logra un golpi di estado den e pais. Dos di e tipo di avionnan aki, lo mester a comete e actonan golpista door di e.o. ataca algun edificio strategico di e pais.

SISTEMA DEFENSA ANTI AEREO

Mes momento Maduro a informa Hulanda tambe cu e sistema defensa anti aereo venezolano ta activa pa cualkier eventualidad si mester derumba un avion di e tipo ey. “Mi a duna orden na canciyer Delci Rodriguez pa avisa Hulanda, cu tin e situacion aki. Nos kier pidi nan (Aruba, Bonaire y Corsou) pa tuma algun medida preventiva, pa en caso e gruponan golpista kier uza un di e aeropuertonan di e tres islanan aki, pa saca un avion Tucano y lague bin Venezuela”.

AVIONAN DEN MANTENCION

E la mustra cu e tipo di avionnan aki tur ta na Venezuela aworaki, pa mantenimento, pues de hecho no mester tin ningun avion di e tipo ey bulando. Y si esaki ta e caso, e lo tin un meta cu no ta bon, segun e presidente. E declaracionnan aki e la haci durante e discurso recien na Venezuela, unda cu a denuncia e intento frustra di e golpi di estado. Por mira e parti di e discurso aki, faltando casi 18 minuut pa final di e video.