Dialuna ex minister Croes ta den corte pa apelacion di caso Ibis

ORANJESTAD – Dialuna mainta ta inicia e caso di apelacion Ibis unda cu tres hues tin cu bay trata e caso aki di nobo pa 6 sospechoso, incluyendo ex minister Paul Croes y su senjora Melony. Hunto cu e pareha Croes, tin 4 otro sospecho cu tambe lo tin cu keda trata un biaha mas. Algun di nan den e prome instante a haya sentencia y otronan a keda completamente absolvi. Ta trata di J.Wever, R. Di Vecchia, N. Nunez, y R. Martinus. Corte a reserva 4 dia pa e caso, cuminsando dialuna mainta 9:30am y ta sigui te diahuebs dia 2 di september. 

E CASO

E intencion ta cu Ministerio Publico lo presenta e rekisitorio di tur 6 sospechoso, reparti den dos fiscal, y e otro dianan lo ta pa e abogadonan respectivo presenta nan defensa di nan respectivo clientenan. Ta premira cu esey lo cuminsa mas sigur diamars. E interes pa e caso ta halto, pero debi cu tin reglanan di Covid19 e biaha aki, e ta limita e aceso di e lugar. Como tal Corte a presenta un solucion unda cu a reserva un lugar na Piedra Plat Entertainment Center (PPEC) unda cu lo retransmiti e senjal di paden di e sala di corte. Esaki pasobra ta solamente familiarnan cerca di e sospechosonan por ta presente den sala durante tratamento di e caso. Tur otro mester busca un sitio, first come first serve, na PPEC. 

E CARGONAN

Entre e cargonan cu tin contra e.o e ex mandatario, ta abuso di poder como un mandatario, falsificacion di firma, labamento di placa, y pertenece na un organisacion criminal. Pa e pareha Croes, tabatin cambio di defensa unda cu e biaha aki nan lo keda reemplasa pa abogado mr Demis Illlis y for di Corsou Peppie Sulvaran (reemplasando abogado Marije Vaders). Aboganan pa sr Wever ta sr Chris Lejuez, sr Di Vecchia ta sra Zuhaila Marchena, pa sra N. Nunez ta mr Rudy Oomen, pa sra Martinus ta sr Chris Lejuez.