ATIA kier pa tin reforma den organisacion di gobierno

ORANJESTAD - ATIA kier pa tin reforma den organisacion di gobierno. Desde comienso di aña ATIA ta papiando cu diferente stakeholders riba e necesidad pa flexibiliza nos mercado laboral. Den sector publico mester reduci e cantidad di trahadornan. Gobierno no por keda fia mas placa pa duna hende trabou, pesey ATIA ta boga pa hisa productividad laboral y pa crea empleo den sector priva.

EMPLEA HENDE

Lastimamente den añanan nos tras no ta sector priva sino ta gobierno ta emplea hende. ATIA ta sostene sigur empleo di hende adecua na entre otro directie wetgeving, directie financiën, SIAD y den salubridad, esta netamente caminda mester di trahador profesional y cualifica. ATIA ta contra creacion di empleo den gobierno cu no ta aporta na produccion of servicio na nos pueblo. Gobierno simplemente mester reduci e cantidad di hende cu trabou innecesario of redundante, paso no por keda fia mas placa pa financia esaki. Un mercado laboral mas flexibel - cu tur su beneficionan - por brinda solucion pe hendenan aki, percurando asina pa desempleo no subi drasticamente. ATIA ta realisa cu baha gasto di personal ta algo doloroso y cu hopi inconveniencia pero inevitabel. Nos aparato gubernamental mester keda realistico y pagabel.