AHATA na su miembronan: Hotelnan ta sigui raporta mas cancelacion cu normal

ORANJESTAD – Aruba ta sigui experencia cancelacionan di camber di hotel, a consecuencia di efectonan di Covid19. Segun un raportahe interno di Aruba Hotel & Tourism Association (AHATA) dirigi pa su miembronan e siman aki,- y cu noticiacla tin den su poder -, e ta alerta nan di e cancelacionan aki valido pa e lunanan di Augustus, September y October di e aña aki. “Nos hotelnan ta continua raporta un volumen di cancelacion mas halto cu normal, debi na e alerta di status di biahe di CDC (Center for Disease Control)”, e raportahe interno ta bisa.   

MEDIDA DI CDC

Manera ta conoci, recientemente CDC a ‘bolbe’ pone Aruba riba e lista di riesco hopi halto pa biaha (e categoria mas halto di riesgo) , debi na e aumento di contagio di Covid19 riba e isla. Acopla na e lista aki, CDC consecuentemente ta recomenda e ciudadanonan Mericano pa no biaha pa Aruba. Y ta mustra cu Mericanonan ta dunando oido na esaki. 

E CIFRANAN

Segun e cifranan difundi door di AHATA pa su miembronan, ta mustra cu segun e lista di reservacion documenta riba dia 7 di augustus (2021), e reservacion di hotel pa Aruba tabata na 77% di ocupacion, y un siman despues, dia 14, esaki a baha te 72% y un siman despues te 70%. Pues 7% den cuestion di tres siman. Pa e luna di September, esaki ta mustra mesun cos. Segun e informacion, pa 7 di augustus tabatin poni 68% di ocupacion di hotel, pero un siman despues, esaki ta bah ate 62% y un siman mas leu te 59%. Pues aki tambe ta mustra un baha consistente. Y finalmente, pa e pronostico di October, e ‘occupancy’ tabata poni riba 7 di augustus na 72%, sigui un siman despues na 66% y finalmente e siguiente siman te na 64%. 

TIMESHARE

Loke ta hala atencion ta cu segun e informacion di AHATA pa su miembronan, e ta sigui mustra cu hasta hotelnan timeshare tambe ta raportando cancelacionan door di e miembronan respectivo. Esaki ta interesante mirando cu semper den tempo di crisis, ta netamente e tipo di hotelnan aki a sa di wanta Aruba su cabez riba awa, debi na e compromise di e miembronan di timeshare. Den tempo di crisis di periodo di noticia di Natalee Holloway, 9/11 y otro momentonan, tabata netamente e tipo di hotelnan aki cu a sa di wanta duro y a laga Aruba keda toch basta stabil.