Covid19 convirtiendo augustus 2021 den uno scur pa Aruba cu 22 morto te awor

ORANJESTAD – Luna di augustus 2021 ta mustra un luna ‘mortal’ pa loke ta casonan di Covid19. Te cu 25 di augustus (ainda falta 6 dia pa bay), Aruba a conoce no menos cu 22 morto caba a consecuencia di e virus aki. Loke ta hala atencion ta cu e cifra halto aki a sosode den apenas 10 dia di augustus, ya cu e otro 24 dianan no tabatin morto. Y por splica esaki pasobra riba e dianan cu e mortonan a cay - cu exepcion di 2 dia- tabatin trata di multiple morto (mas cu 1) cu a cuminsa na final di e di dos siman di e luna aki. Y tabata apenas mitar di augustus ultimo cu DVG a raporta cu ‘den 30 dia tabatin 10 morto di Covid19’. Esaki pues a keda nada compara cu e situacion actual. Y e ta mustra cu e variante Delta, definitivamente ta uno hopi mortal. 

DATONAN COMPILA

Segun e datonan compila, entre 11 di augustus pa ayera 25 di augustus, riba e dianan cu a raporta morto, ta solamente 2 dia a raporta 1 morto. Tur e otro dianan tabata multiple morto, unda cu 5 dia a raporta 2 morto, 2 dia a raporta 3 morto y ayera esaki a kibra ‘record’ cu un total di 4 morto (uno na Colombia) pa Covid19. Segun datos, na tres occasion so a raporta cu ta di edad avansa (60+), y mayoria di e casonan tabata hendenan cu no a vacuna. Y esnan cu a vacuna, tabata pasobra nan tabatin un malesa cronico. Y ainda falta 6 dia di augustus pa bay.