Corsou ta pone St Maarten riba lista di pais di risico hopi halto

WILLEMSTAD – Despues cu Bonaire a haci e anuncio cu ta considera tanto Aruba,Corsou y St Maarten entrante diahuebs como di pais riesgo halto, Corsou a añadi St Maarten (tanto banda Hulandes como Frances) como pais di riesgo halto. Esaki mirando e aumento drastico di casonan cu e isla ey ta confrontando di Coronavirus. Te cu ayera ainda e isla tabatin 330 caso activo, cu pa e isla ta hopi, y 46 morto. Aruba ta figura riba e lista aki caba di un siman y mei atras, unda cu ta exigi pa haci un PCR test prome cu bishita Corsou y despues di tres dia un antigen test y finalmente ora cu bolbe Aruba, Aruba ta rekeri un PCR test. Tur e tres islanan ABC a elimina nan bubble por lo pronto, cu ta nifica cu tur rekisito ta conta pa e islanan atrobe.