WEB a cuminsa busca reemplasante pa su director anterior

ORANJESTAD – Casi un luna despues cu ex director Luis Oduber a acepta e ‘pakete di retiro’ como hefe maximo di e compania di utilidad WEB Aruba NV, Utilities formalmente a cuminsa busca un reemplasante pafo di e compania. Avisonan a cuminsa circula cu e compania ta en busca di un director general nobo. Manera ta conoci, a dicidi cu ta ‘consolidad’ e posicion di director general y director financiero den un solo funcion. Den rekisito pa e funcion ta pidi tambe un conocemento financiero administrativo. 

REKISITO

Entre e rekisitonan, e director no por evita e comentarionan positivo pero tambe critico di stakeholders y e compania mes, pero mester ‘maneha su propio rumbo den interes di WEB”. Esaki ta interesante mirando cu ta netamente esaki ta loke a causa un problema ora cu a bay contra stakeholdernan, cu e argumento cu e no ta den interes di WEB. Ta buscando tambe un persona cu tin experiencia amplio, y tambe cu conoce e idioma Papiamento, pues ta buscando e ora posiblemente un persona local. 

WEVER CROES NORM

Loke tambe a hala atencion ta cu e salario menciona den e aviso di solicitud ta haci mencion cu esaki lo ta ‘conforme e Wever-Croes norm’, manera anuncia, cu ta maximo 130% di e salario di e prome minister. Den e caso aki, por pensa den direccion di entre 19 pa 20 mil florin maximo pa luna cu e director lo por gana, compara cu e loke e tabata gana awor cu ta hopi mas cu esey. Te cu awor, e director tabata gana 22 mil pa luna plus un 13de, 14de y 15de maand y mas cu un luna (9%) di vakantie uitkering, y e CFO (cu tambe a haya su retiro) tabata gana 20 mil pa luna plus. Tur esaki awor ta keda elimina. Tabata abata na April di 2020 cu e prome minister di Aruba Evelyn Wever Croes, a anuncia e introduccion aki pa directornan ‘nobo’ di companianan di gobierno y semi gubernamental. Esnan cu tabata director caba, mester a purba ‘negosha’ cu nan, pa no haya problema legal. E peticion di solicitud ta rekeri contesta pa mas tarda fin di September, pues por spera pa luna di November cu lo por tin nombramento di un director nobo pa WEB, of por lo menos prome cu fin di e aña aki.