Tin 5 pashent a biaha pa Colombia awe nochi cu 4 ambulance flight

ORANJESTAD – Awe nochi no menos cu 4 avion ta biahando pa Colombia pa transporta pashentnan pa nan salud for di Aruba. Ta trata di 4 air ambulance jet cu lo transporta entre nan 5 pashent, di cual 3 ta pashent di Covid19 y 2 ta grave pero no pa Covid19. Tur esaki pa alivia e ICU na hospital na Aruba cu ta completamente yen. Director di AZV Edwin Jacobs a confirma esaki awe nochi pa Noticiacla. “E situacion ta critico” sr Jacobs a sigui bisa. Den dia, a compronde cu varios pashent mas a keda hospitalisa pa Covid19, y asina e dianan ta yena. Fuentenan di ambulance ta conta cu e situacion ta hopi tenso y hopi hopi druk mes. Ta mula nan ta haya y ta trahando hopi pa por sigura cuido pa e pashentnan. Si tene cuenta cu cada buelo ta costa por lo menos 23 pa 24 mil florin, por conta cu den un solo anochi, esaki ta sali AZV 100.000 florin na buelo so. Y esaki ta cu ta combinando e buelonan pa asina reduci e gatonan, sino ta mas mester a paga. Y ainda ta bin acerca como 25 mil florin extra pa pashent durante e estadia na Colombia. Pues na estadia tambe ta bay un otro 125 pa 150 mil florin den un solo dia. Y teniendo cuenta cu tur e dianan aki casi tin buelo, por compronde con caro e asunto aki ta. NOTA:  E potret ta di archivo di noticiacla di un pashent di Covid yegando hospital pa tratamento.