Aruba, Corsou y St Maarten entrante diahuebs ta pais riesgo halto pa Bonaire

KRALENDIJK - Aruba, Corsou y St Maarten entrante diahuebs ta pais riesgo halto pa Bonaire. Asina gobierno di e isla di flamingo a determina awe diamars. E motibo ta e cantidad halto di contagio na e islanan aki. Temporalmente Bonaire a anula e bubble tambe entre e isla y Corsou tambe. Ainda no ta conoci si Corsou ta adapta e condicionan di biahe pa e biaheronan for di Bonaire. Anteriormente Aruba a anula e bubble cu Bonaire. 

KICO ESAKI KIER MEN

Biaheronan cu a vacuna y biaheronan cu no a vacuna for di 12 aña for di e islanan menciona, cu ta biaha pa Bonaire, maximo 48 ora prome cu salida, mester haci un PCR. Biaheronan cu no a vacuna for di 12 aña bay ariba mester haci un test antigenico na yegada. Si biaheronan cu no a vacuna for di e islanan menciona, haci e test di PCR maximalmente 24 ora prome cu salida pa Bonaire, nan no mester haci e test antigenico na yegada. Biaheronan di tur edad mester yena e declaracion di salud 72 -48 ora prome cu salida pa Bonaire riba www.bonairepublichealth.com of www. Bonairecrisis.com.