Oduber: Na maart/april construccion Bahia Principe por cuminsa

ORANJESTAD – Na maart of april di e aña aki, trabou di construccion fisico por cuminsa pa e proyecto hotelero Bahia Principe. Por lo menos esey ta e speransa di gobierno di Aruba, segun declaracion di minister di turismo Otmar Oduber. “Nos ta purba keda streef. Nada no a cambia den esey. Ohala cu den careda di maart/april e construccion por inicia”, e mandatario a bisa. E proyecto a keda anuncia aña pasa october, cu e promesa inicial cu pa comienso di e aña aki e trabounan lo por a cuminsa.

REUNIONAN CU REPRESENTANTENAN

E mandatario a sigura cu trabounan ta canando pa e proyecto hotelero na Sero Colorado. Representantenan di Bahia Principe tabata na Aruba, como parti di nan preparacion pa cuminsa cu e proyecto, y ta biniendo Aruba cu basta frecuencia, segun palabra di e mandatario di turismo. “Nan a reuni e siman aki cu colega Sevinger” Oduber a sigura NoticiaCla.com ayera. “ Nan ta den proceso pa keda cla cu e estudionan ambiental, impacto social/economico. Tur esaki ta den ehecucion” e mandatario a sigui bisa. Unabes cu esaki termina, e plannan ta wordo prepara.

CANTIDAD DI CAMBER

E proyecto den su prome fase, ta papia di un total di 350 camber, sigui pa 550 camber den e di dos fase, y den 6 aña kier yega na 800/900 camber segun e mandatario di turismo a sigui bisa. Den mesun rosea, e mandatario no ta kere cu mester emplea un solo hende di afo. “Mi ta kere cu nos tin suficiente hende cu ta terminando scol. Nos tin suficiente hende cu nos por capacita pa drenta e forza laboral. Mi ta papiando di mas of menos 450 hende cu nos mester den e prome fase di e hotel”. E mandatario ta kere cu mester crea un competencia interno, y esey tabata e maneho di e mandatario tempo cu e tabatin e cartera di labor.