Venezolanonan residente riba Aruba a mustra sosten na presidente Maduro

ORANJESTAD – Dilanti un grupo di mas of menos 50 venezolano cu ta simpatisa e gobierno venezolano actual, e Consul General ‘de Segundo’ Luis Cardenas a transmiti un mensahe di nan presidente Nicolas Maduro. E mensahe tabata uno denunciando e ultimo intento di un golpi di estado di e pais. Segun e consul mes esta Amabel Lugo, -hopi limita den su declaracion- , a splica NoticiaCla.com awe nochi cu, debi cu nan a haya varios pregunta henter siman di ciudadanonan preocupa, a dicidi di tene e anochi aki di informacion. Otro informacion mas recien manera e ‘cuestionamento di teritorio aero di Venezuela, y un update riba e asunto di derumbe di avion’, e consul no por a comenta ariba. Nan ta keda topiconan delicado, y sin aprobacion di e canciyeria, no por duna ningun comentario publico.

E MENSAHE

Awenochi mientrastanto, nan a presenta un documento di 10 pagina cu mensahe di e presidente, presidi pa un presentacion audiovisual, splicando e situacion venezolano di antes y awor. E mensahe awe nochi tabata cla. Forzanan aheno por sigui purba, pero nan lo no logra derumba e gobierno actual. “E hecho cu comandante Chavez no tey mas, no ta nada. Ta sigui presidente Nicolas Maduro, y nos lo lucha te na final” Cardenas a sigura un y tur awe nochi. Varios a haci pregunta y mustra cu nan ta sinti cu mester duna un miho imagen di e loke e gobierno actual ta haciendo pa e comunidad, especialmente na Aruba. Un di e topiconan treci dilanti pa un ciudadano venezolano residencia aki, tabata e situacion di aña pasa, ora cu ex general Hugo Carvahal a bin Aruba y haya su mes den un problema serio y termina finalmente expulsa di Aruba. E la haya siguransa di consulado cu tur a wordo loke mester a wordo haci segun regla di consulado. “Mi no sa unda abo tabata señora, pero mi por sigura bo cu consulado a haci su trabou debido” Cardenas a sigura e señora.

MANIFESTA

E anochi mes a sigui sin ningun problema alguno. Inicialmente tabatin un pensamento cu e anochi aki lo por a bira uno confrontativo, ya cu e mensahe inicial ricibi, tabata cu venezolanonan lo a bay manifesta nan apoyo publicamente na nan presidente Maduro. Ora cu e noticia aki a sali, comentarionan di ciudadanonan di Aruba riba e red social di e.o. Facebook, a mustra cu nan ta desaproba cualkier intento di protesta, y cu esaki no mester wordo permiti. Consulado a responde indicando mesora cu ningun momento e intencion ta pa un tipo di manifestacion, sino mas bien un reunion informativo unda cu consulado ta retransmiti un mensahe contra e intento di golpi di estado.

INTENTO FRUSTRA

Esun di siman pasa tabata un di e hopi intentonan pa derumba e gobierno actual. E prome cu a logra tabata na 2002 ora cu pa 3 dia largo e presidente di e tempo ey, Hugo Chavez, a keda baha pa despues retoma e poder y mantene esaki pa mas di 15 aña, te na su morto dos aña pasa. For di e momento ey, actual presidente Nicolas Maduro ta na timon, y purbando di wanta e control miho cu e por.

VENEZOLANONAN NA ARUBA

Na Aruba tin un total di entre 3000 pa 3200 venezolano oficialmente registra segun cifra di Censo 2010. Consul Amabel Lugo Ta confirma cu nan tin contacto y tin e grupo aki registra. Un grupo manera esun di awe nochi ta considerable, considerando e ora y e forma con e reunion aki a wordo yama. A admiti cu, dependiendo e evento y dia, sa tin mas persona cu ta acudi. Pero e grupo cu a presenta, tabata respeta pa nan y e mensahe a wordo transmiti.