Pa falta di personal, DVG a tarda pa saca hende di isolacion

ORANJESTAD – Pa falta di personal, Departamento di Salud no por a saca personanan cu a recupera di Covid19, for di isolacion mas trempan. Tambe tabatin tardansa den contact tracing ora cu hende bira malo. Asina e a resulta den fin di siman. Ora cu a cuestiona con diripiente por tin mas di 300 persona cu ta ‘recupera di Covid19’ riba un dia, siendo cu no tabatin 300 hende riba un dia cu a keda registra cu Covid, a bin e splicacion ey. Hendenan cu a ‘recupera’ no por a haya e ‘status nobo’ pasobra no tabatin hende pa contact nan y actualisa e status di e persona. Pues porta e persona a recupera, pero oficialmente tabata registra ainda como pashent di Covid. 

PERSONAL

A mustra cu pa e ultimo dos siman, tabatin cifranan di casonan positivo di Covid di 100 of riba 100 pa dia. A bisa cu ‘DVG a indica na varios occasion cu no tabatin suficiente personal pa entre otro yama esnan positivo, y haci contact tracing cu e grupo grandi aki (riba 1000 dado momento). Esaki pasobra pa cada persona malo, mester a yama minimo entre 2 pa 5 persona pa duna instruccion. Como tal e proceso pa saca hende for di isolacion y saca nan nomber como ‘contagia’, tabata hopi ‘slow’.  Ta diasabra a busca personal extra pa yuda mas tanto persona cu ta possible y saca nan for di isolacion. Pesey e cifra a subi di un dia pa otro asina hopi.