Vroegop: Cantidad di pashent interna pa Covid19 a bira menos

ORANJESTAD – E cantidad di pashentnan contagia cu coronavirus den hospital a bira menos den e ultimo 24 ora. Asina director di Horacio Oduber Hospital Jacco Vroegop a confirma noticiacla diadomingo. “Tambe e cantidad di pashent cu tabata wordo interna cu Covid19 a cuminsa baha. Ban spera cu e trend aki sigui” e director a sigui bisa. Y e cifranan tabata mustra esey. Diabierna ainda e cantidad tabata 85 y diadomingo esaki a baha te 65. 

CIFRA DUNANDO IMAGEN ROBEZ

Den pasado, e cifranan tabata duna un bista robez si, unda cu mientras cu e pashentnan tabata bandona hospital, no tabata realmente pasobranan nan a recupera, sino cu nan situacion tabata menos grave, y tabata manda te hasta algun cas cu oxigeno pa nan sigui recupera na cas. Pero no cu nan a bandona hospital pasobra nan a recupera. Y di e cifra di ICU tabata baha esaki, pero no necesariamente pasobra a recupera, sino simplemente pasobra e pashent(nan) ey a fayece y e ora logicamente e cifra ta bira menos. Con e situacion ey aworaki ta, ainda no tabata conoci y ta pendiente un contesta ainda di e director. 

MAS AYUDO

Loke e director a bisa tambe, ta cu e ta conten cu tin mas ayudo di AMI ( e grupo di enfermero for di Merca pa ICU) na caminda pa Aruba. “Esaki lo yuda expande e capacidad di ICU  y por duna mas persona e ayudo necesario. Nos ta increiblemente contento cu Hulanda ta sostene nos cu esaki” Vroegop a sigui bisa. 

CIFRA EXPLOSIVO

Tabata netamente e situacion di hospital diabierna cu a pone Crisis Team drenta den un situacion di emergencia reuniendo te marduga pa bin cu medida nobo introduci diadomingo. Diabierna entre 4or di atardi pa 7or di anochi, hospital a ricibi no menos cu 8 pashent di Covid19 cu hospital a considera demasiado. Ey a ranca e bel. Y mirando cu hospital ta e ‘benchmark’ (e midi) cu cual Crisis Team ta basa su mes ariba pa tuma medida, esaki tabata motibo suficiente. Dia 1 di augustus, tabatin ‘apenas’ 10 caso di hospitalisacion di Covid19 na HOH. Esaki den un dia a casi bira doble cu 17. Un siman despues a triplifica esaki y pa e di dos siman di augustus, ya e cifra a yega 54 caso hospitalisa. Y despues di 4 dia, esaki a aumenta cu 30. Algo no normal. Awor e ta bahando, y a yega 65. Ta spera cu no ta un situacion di weekend so, manera cu ta e caso di cifranan di contagio, cu den fin di siman ta baha, y despues subi despues di fin di siman.