Aruba ta convivi cu Hulanda den momento di tristesa

ORANJESTAD - “Pueblo di Aruba den shock cu cantidad di Hulandes a perde nan bida den accidente di avion”. Esey ta e mensahe cu premier Mike Eman a manda relaciona cu e accidente horrible di e avion di malaysia Air, cu a cay matando mas di 290 hende, di cual 192 hulandes. Gabinete Mike Eman II a manda un carta pa Gobierno di Hulanda expresando condolencia na e pueblo Hulandes. No obstante e impasse entre Hulanda y Aruba, Eman a sigura cu e no ta kita na nada e amor y aprecio di e pueblo y su gobernantenan pa pais Hulanda. Por a nota cu na momento cu Prome Minister Mike Eman a finalisa su welga di hamber, un di e prome puntonan cu el a trece dilanti cu Aruba ta convivi cu Hulanda den e momento di tristesa grandi pa e cantidad grandi di Hulandesnan cu a perde nan bida den e accidente aereo di Malaysia Arlines. Eman, despues di a termina su welga di hamber diahuebs merdia, a pidi e publico presente pa tene un minuut di silencio pa recorda e victimanan y nan famia.