IMSAN a para operacionnan pa personal asisti na HOH cu Covid19

ORANJESTAD – Director di hospital Horacio Oduber sr Jacco Vroegop diasabra a confirma pa noticiacla cu enberdad IMSAN a cera nan sala di operacion/cirugia, y a bay yuda nan coleganan na Dr Horacio Oduber Hospital. “Si, ta corecto” Vroegop a bisa. “Nan ta bin yuda nos!”. Mes momento el a admiti cu a dura un poco pero cu nan a keda cla. “Nos ta echt contento cu esey” sr Vroegop a sigui bisa. Awe mainta prome minister Evelyn Wever a confirma tambe cu tur specialista awor ta dedica completamente na Covid19 y ta para nan area di specialidad, djis pa duna un man na esnan infecta cu e virus. Asina serio e situacion na hospital ta. 

CODE PRETO

E prome mandatario awe mainta durante e conferencia di prensa a sigura tur hende cu, contrario na rumornan pafo, hospital ‘ainda’ no ta den code preto. Esey ta e codigo internacional conoci unda cu e hospital ta bay den un tipo di emergencia y tin cu literalmente dicidi ken ta biba y ken ta muri, den sentido cu na e momento ey, nan tin cu dicidi cua pashent tin mas sentido pa yuda, y cu no lo bay muri, compara cu otro, contrario na e politica cu tur ta wordo yuda. “Nos no ta den esey” Wever a bisa y a spera mes momento cu nunca yega na esey. “Hospital ainda tin e  bou di control, pero e ta cerca di bira critico” e mandatario a sigui bisa. 

OPERACION A PARA

Tur operacion a para, y esaki ta problema pasobra tin pashentnan cu no tin nada di haber cu Covid19 pero cu si mester di atencion pasobra sino nan salud por bira dramatico y crucial. 

SEH

Loke ta un problema ta cu debi na mal comportacion di un grupo di nos hendenan, un gran cantidad di persona ta yega Eerste Hulp (Spoed Eisend Hulp) pa motibo di accidente debi na simplemente caso di buracheria y of maltrato, cu por a wordo evita si no a fiesta of bebe di mas. Tur esaki ta kita cama di esnan cu mester di dje pa Covid19.