AFBA: Crisis Team no a consulta cu nan acordando medidanan nobo contra Covid19

ORANJESTAD – Algun rato cu gobierno y Crisis Team a anuncia e medidanan ‘nobo’ contra Covid19 diasabra mainta, e asosacion di negoshinan F&B, Aruba Food & Beverage Association (AFBA) a aclarea cu, contrario na locual a wordo expresa durante e conferencia di prensa, nan associacion no a wordo consulta durante e reunion di crisis team na unda e medidanan aki a wordo acorda.

AFBA a sigui splica cu nan ta compronde cu mester tuma medidanan pa baha e nivel di contagio y pa stabilisa e situacion critico na HOH, pero colectivamente nos no por para tras di e siguiente medidanan: 

- orario di ciere di 9or PM

- limitacion di 4 persona pa mesa 

Segun AFBA, medidanan mester wordo dirigi na e fuente di e problema y no riba e negoshinan di F&B particularmente.  E medidanan ta pone cu un biaha mas e sector aki lo sufri severamente cu tur e consecuencianan cu esaki por bin cune. 

“E orario di cierre di 9or PM ta keda pa nos sector uno dificil pa traha cune. Esaki ta crea presion y un ambiente insigur pa nos trahadornan mirando cu tur cliente mester wordo atendi den un solo seating” e comunicado ta sigui bisa.  

E cantidad di persona na mesa ta irrelevante mirando cu cada persona por ta sinta banda of dilanti di un solo persona, pues e no ta haci diferencia riba nivel di contagio. 

Pa e asosacion, e Toque de Queda for di 11or PM pa 5or AM lo tabata suficiente pa stop fiestanan clandestino. 

INVITACION

Na final, AFBA a extende un invitacion y ta urgi na tur esnan cu no a vacuna ainda, especialmente den nos sector di F&B,  pa haci uzo di e oportunidad di vacuna mayan durante e Vacunathon cu lo tuma lugar na Ritz Carlton Hotel. Door di vacuna abo tambe lo contribui pa nos por sali mas liher for di e crisis aki.

—