Gobierno ta re-introduci Toque de Queda entrante diadomingo atrobe

ORANJESTAD – Debi na e situacion cu tin aworaki na hospital di Aruba, Crisis Team y Aruba a re-introduci Toque de Queda entrante diadomingo 22 di augustus 2021 for di 10’or di anochi te 5am. Ademas ora di ciere di negoshinan ta bira 9pm te 5am. Y ta reintroduci samenscholings verbod pa 24 ora. E medidanan re-introduci ta valido te dia 1 di september proximo. Tabata diabierna anochi cu Crisis Team a reuni te awe marduga pa evalua e situacion di Aruba, debi na e aumento drastico di hospitalisacion di pashent di Covid19.

RESTAURANT

Ademas di e medidanan re-introduci, a pone regla pa restaurantnan unda cu ta permiti maximo 4 persona na mesa den restaurant pafo y paden. Den tur establecimento nocturno, por tin solamente hende sinta. 

BISHITA FIESTA

Bishita na cas, fiesta y encuentro social na cas of otro caminda no ta permiti.

COMERCIO

Comercio ta wordo limita na 50% (cinema, tienda, supermercado, entiero, misa).

DEPORTE 

Deporte ta keda limita na training so, y competencia no ta permiti.