Competencia di landamento pa clasifica pa CARIFTA den weekend

ORANJESTAD - E dianan 20, 21 y 22 di februari, Arubaanse Zwembond, AZB lo tene su competencia clasificatorio den landamento pa loke ta e competencia di CARIFTA 2015. E competencia lo tuma luga den Piscina Olimpico Roly Bisslik na Savaneta. E competencia aki ta crea specialmente pa duna tur landado e oportunidad di clasifica pa e CARIFTA Championship.

Tanto diabierna como diasabra e competencia lo inicia den oranan di atardi pa ser exacto 6or y 7or mientras riba diadomingo esaki lo ta pa 9.30 di mainta. Clubnan participante lo ta Aruba Dolphins, The Orcas y Stingray Swimming. E categorianan den cual lo competi e tres dianan lo ta: 6 aña, 7-8 aña, 9-10 aña, 11-12aña, 13-14 aña, 15-17 aña y 18 aña y mas. Un danki sigur na Lotto, e Loteria di Aruba pa medio di Comision di Subsidio cu a subsidia e tres dianan di competencia clasificatorio CARIFTA 2015.

Ta bon pa bisa cu den e ultimo añanan di e competencia di CARIFTA, cual ta uno entre tur e islanan Caribense, e seleccion di landamento di Aruba semper a destaca den forma impresionante unda a logra triunfa cu numeroso medaya di oro, plata y brons. Tambe e landadonan a gana trofeonan individual conoci como e “Highpoint Trophy”. Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.