Partido MEP y RAIZ a firma acuerdo di gobernacion digital na San Nicolas

SAN NICOLAS – Diahuebs anochi dilanti di e lugar historico Nicolas Store, lidernan di partido partido MEP y RAIZ a firma un documento digital di 10 punto cu ta e acuerdo inicial di gobernacion pa e proximo 4 añanan. E motibo di e localidad scohi ta pasobra segun MEP e ta duna San Nicolas e importancia cu e merece. Lider di partido RAIZ, a bay mas leu y bisa e.o. ‘ San Nicolas ta mucho mas cu un refineria’, indicando cu e unico diferencia di RAIZ su declaracion 4 aña pasa, ta e inclusion di e palabra ‘mucho’, poniendo asina mas enfasis. 

E ACUERDO. 

E ta den liña grandi, y a bisa cu unabez cu e carteranan ta conoci, cada minister tin te fin di October pa entrega nan contenido basa riba e acuerdo di gobernacion. Esaki ta pone cu cada minister y ministerio, cada minister lo yena e puntonan specifico. 

E PUNTONAN

E diez puntonan ta entre otro integridad, derecho social y bienestar di e ser humano, finanzas publico, economia, husticia, seguridad y prevencion, infrastructura y desaroyo sostenibel, enseñansa, deporte y cultura, cuido medico, relacion di reino y un tipo di geschillenregeling entre partido RAIZ y MEP. 

MINISTERNAN

Mientras cu a sigura cu diahuebs anochi lo no ta divulga e carteranan cu e ministerionan, e forma con e puntonan a wordo presenta, a duna indicacion cu esaki a sosode segun e reparticion di e carteranan. Por ehempel, por pensa cu e punto # 7 manera menciona, esta enseñansa, deporte y cultura, por a asumi cu esaki por bira un cartera ministerial cu tur e tres puntonan aki. Contestando un pregunta di prensa riba e tema aki, e formador sra Evelyn Wever Croes a desmenti esaki categoricamente. Tempo lo bisa si esaki enberdad ta e situacion. 

GESCHILLENREGELING

Loke tambe a hala atencion ta e punto # 10 cu ta un commission cu lo wordo forma cu e meta pa resolve diferencianan di opinion entre e dos partidonan pa asina sigura cu no tin problema entre e partidonan. Algo cu anteriormente no tabata e caso. 

KICO AWOR

E mandatario a bisa cu despues di a papia cu 101 stakeholder, lo  reuni mas of menos un siman mas pa concretisa e parti di e programa, incluyendo cu reparticion di cartera y escogencia di e ministernan. Ta premira cu mester pues un pa dos siman mas pa e proceso completo di formacion keda cla. Otro siman diabierna ta e ‘ultimatum’ cu gobernadora di Aruba a duna formador. Sinembargo segun formador Wever Croes, esey no ta un ley y ta mas un palabracion pero por alarga esaki. E unico asunto den ley den e caso di formacion, ta cu pa 25 di September proximo, esnan cu actualmente ta minister y parlamentario, si no tin gobierno forma ainda, mester scohe si nan ta keda minister of ta bay pa parlamentario.