Parlamento a aproba cambionan di ley pa cumpli cu Caribbean Financial Action Task Force

ORANJESTAD – Cu 15 voto na fabor y uno contra, Parlamento a aproba cambionan den ley pa cumpli cu recomendacionan di Caribbean Financial Action Task Force (CFATF) proximamente. E tratamento a cuminsa diahuebs mainta, cu presencia di ministernan di Finanzas, premier y Minister di Husticia. Por lo general e cambionan ta riba nivel technico y ta yuda pa Aruba su evaluacion cu ta tuma lugar fin di augustus pa CFATF por ta exitoso. 

KEDA SIN CUMPLI TA SALI MAS CARO

Durante e debate Minister Maduro a indica cu di berdad e reglanan ta stringente y nan ehecucion ta costa placa, pero keda sin cumpli tambe tin un prijs halto. Ehempel di esaki ta e 'derisking' cu ta tuma lugar unda cu institutonan financiero cu netwerk internacional ta reduci nan riesgo door di no brinda of limita nan servicio na institutonan financiero na Paisnan cu no ta cumpli cu e reglanan pa salbaguardia e integridad di e sistema financiero. Recientemente nos por a mira con ABN AMRO a haci su ehercicio di 'derisking' na unda cu Aruba, por ehempel, a keda conta cu nan servicio financiero na un costo mas abou cu, por ehempel, na Corsou. Esaki a trece cune cu un cliente di dicho banco na Aruba ta paga 8 dollar pa un transaccion siendo cu un cliente na Corsou ta paga 15 dollar pa e mesun tipo di transaccion. Clientenan na paisnan cu no por cumpli cu e reglanan stringente tin cu paga mas pa por haya servicio financiero. Keda sin cumpli cu e reglanan di FATF na fin di dia ta sali e Pais y e consumidor mas caro. 

E VOTAMENTO

Manera indica, e cambionan den e ley a keda aproba cu un mayoria di 15 voto di e fraccion di MEP, RAIZ y AVP. Segun minister Maduro, e motibo cu Fraccion di Accion 21 a bay contra e cambionan ta pasobra nan ta iindica cu e ley ta stroba comercio y a compara Aruba cu paisnan manera Nicaragua, Panama, Barbados, Haiti, Jamaica y Cayman Islands cu no ta cumpli cu reglanan di integridad financiero, pero toch no a wordo exclui di e sistema financiero internacional. Segun Minister Maduro bo no por compara Aruba su sistema financiero cu e paisnan aki ya cu e prijs cu nos mester paga ora di no cumpli ta mucho halto pa bay gamble riba dje.