Garage Cordia cu prome "Meet & Greet Car Show"

ORANJESTAD – Diasabra awor Garage Cordia ta tene su prome ‘Meet & Greet Car Show’. Na Aruba hopi biaha ta organisa "Car Show" referiendo na autonan clasico of na autonan di careda. Pero ainda nunca a yega di organisa un evento estilo di Merca, esta un simpel "Meet & Greet Car Show" den cual doñonan di cualkier auto drecha, sin cu mester ta di marca Toyota, por atende. E evento ta tuma luga diasabra awo for di 5:00pm na Garage Cordia situa na Camacuri.

IDEA

E idea a nace for di e seccion di garashi na Garage Cordia, den cual mecaniconan ta topa cu doñonan di e autonan aki a base diario. Hopi biaha ta autonan cu kisas no ta bin Aruba mas, manera un Cressida, Supra of un pickup Hilux di 20 aña bieu. No por considera e autonan aki como clasico, pero si special pa nan doño cu ta cuida nan bon, ta busca piesa pa nan, ta "customize" nan na smaak y asina mantene e autonan riba caminda.

 ENTRADA

Entrada na e evento ta gratis, mescos tambe ta participacion di e doñonan di e autonan aki. E idea ta pa topa cu otro doñonan di auto, pa expone bo creatividad, pa comparti experencia, ideanan y informacion valioso pa tur cu ta gusta cuida nan auto modelo bieu. Tambe por ta autonan mas nobo, pero di cual cu e doño a adapta e exterior of interior na su gusto.

50 AÑA 

E aña aki Garage Cordia Aruba ta celebra 50 aña di existencia, den cual nan a representa e marca di auto mas bendi na mundo, esta Toyota. E agencia di auto lo tene diferente evento durante henter aña, pa por estrecha su lasonan mas ainda cu su clientenan. E mercado aki di autonan di hopi aña ta demostra durabilidad di e marca, disponibilidad di piesa y sin lubida e experencia unico di e mecaniconan, capaz pa drecha y “service” autonan nobo y esunnan di algun aña riba caminda tambe! Na final Garage Cordia lo saca dos premio entre tur e participantenan, un "Best in Category" y un premio pa "Best of Show". Pa mas informacion participantenan por manda un email pa carshow@cordiaaruba.com. Pa haya un bista di e preparacionnan, por subi http://goo.gl/K9OLMM.