Hospital di Aruba a yega cantidad record di hospitalisacion pa Covid19

ORANJESTAD – Ayera hospital di Aruba a yega cantidad mas halto di hospitalisacion pa Covid19. E cifra di 70 ta halto, aunke cu tin 13 pashent na Colombia. Asina mes si kita nan, e cantidad ta keda record y ta esun mas hopi cu hospital tabatin desde cu e crisis a cuminsa na 2020. Algo sigur di preocupa. Ora cu a confronta e director di hospital di Aruba Jacco Vroegop cu e infomracion, e director a confirma esaki pa noticiacla.  “Si, esey ta corecto” Vroegop a contesta. Pero el a bay mas leu. “Mi tin miedo cu e lo keda asina un poco mas largo”. 

AUMENTO EXPLOSIVO

Segun un investigacion di e portal aki ta mustra cu e luna aki (augustus) a cuminsa (1 augustus) cu 10 persona hospitalisa pa Covid19. Apenas un dia despues e cantidad aki a bira casi double aumentando cu 7 pa un total di 17. Despues esaki a keda subi diariamente pa varios dia, te yega 23. Esey a dura tres dia y despues el a sigui subi mas fuerte y ya pa ayera, e tabata na 70, siendo cu un dia prome ainda e tabata na 61. Pues a subi atrobe cu 9 persona. Y esaki ta cu nos ta apenas na 19 dia di e luna y ainda falta 13 pa luna di augustus termina. 

PERSONAL 

Aunke tabatin un ayudo di personal e siman aki for di Merca, e ta keda un problema. E problema aworaki ta specialmente e falta di personal. “Nos tin menos ayudo externo cu tempo di e di dos y di tres ola” sr Vroegop a sigui comparti cu e portal aki. Ta spera cu e siman aki ainda por logra haya mas personal, sino e situacion lo bira aun mas peor.  

CIFRANAN DI CRISIS TEAM 

Segun cifranan cu Crisis Team a divulga ayera, te cu cu ayera, tabatin 70 persona di Aruba interna cu Covid19 di cual 9 ta den ICU na Aruba, 13 den ICU na Colombia, 46 riba piso general na Aruba y 2 riba piso di maternidad na Aruba. E cifranan ta mustra cu nan por ta esun mas halto Di esnan interna den hospital na Aruba 18% ta vacuna cu uno of mas vacuna y 82% no tin ningun vacuna. Den ICU na Aruba di 9 persona interna 1 persona tabata vacuna y 8 no ta vacuna. NOTA: E potret ta di un caso di hospitalisacion di un pashent di Covid19.