Wever: No ta anuncia ministernan nobo awe, pero ta firma acuerdo di gobernacion

ORANJESTAD – Awe nochi partidonan MEP y RAIZ ta firma nan acuerdo di gobernacion, unda cu den liña grandi lo splica kico tur lo haci den e proximo 4 añanan. Loke no ta bay sosode, ta cu ta bay anuncia ken tur ta bira minister, manera ta e speculacion inicial. "Esey no ta e intencion" formador Evelyn Wever Croes a bisa. Esaki lo sosode na un otro occasion segun e mandatario a bisa. Solamente si awe ainda keda cla cu e reparticion di cartera, lo por anuncia esey, pero no ken ta bira minister si. ":Ora nos ta cla cu esey nos lo anuncie" formador Wever Croes a confirma pa e portal aki awe mainta. 

LUGAR

A opta pa usa e lugar conoci como Nicolas Store den forma simbolico pa mustra e importancia cu e ciudad aki lo tin pa e gabinete den e proximo gobernacion. Mescos a usa e firmamento di e intento di gobernacion 5 siman pasa na Farro, como un simbolo di integridad pa cual e gabinete aki ta para, segun Wever. A bisa tambe cu pa otro siman diabierna mester entrega un rapport na gobernador. A haya un plazo di 3 siman dia 9 di augustus door cu no a keda cla cu e tarea inicial. Pero ta mustra cu posiblemente mester di dos siman pa keda cla. Pero esey no ta un problema. E loke tin cu informa gobernadora, ta cu a keda cla of no, y esey por bisa otro siman. E ora ta simplemente warda riba e proceso di screening, cu por tuma su tempo, y despues ta set un fecha pa huramenta e ministernan. E ceremonia di awe nochi ta tuma lugar entre 6’or y 8’or. Potret cortesia Stichting Monumentenfonds.