Faltando dos siman ainda, Covid19 ya a dal Aruba duro den augustus

ORANJESTAD – Un analisis ‘simpel’ haci di cifranan pa luna di augustus di Covid19 pa e portal aki, ta mustra con malo e luna aki ta(bata) pa Aruba ‘danki’ na Covid19. Y esaki ta ‘apenas’ e prome dos pa siman di e luna. Ainda falta. Ban cuminsa cu e casonan pa dia. Durante e prome 18 dianan di augustus di e aña aki,- cu excepcion di un dia -, ta solamente cifranan di weekend Aruba a registra bou di 100 caso nobo positivo pa dia di Covid19. Tur otro tabata riba 100. Esey kier men cu a apenas 7 di 11 dia di e luna aki, no a registra riba 100 caso pa dia. E record tabata 192 caso riba dia 13 di augustus mientras cu esun mas abou tabata 102 caso riba 14 di augustus di e aña aki. 

CIFRA TOTAL ACTIVO

Di otro banda, un detaye interesante ta cu e e cifra activo total no a sigui subi sino ta mas bien wanta aworaki entre 1000 y 1050 pa algun dia, siendo cu e lo mester tabata hopi mas halto. Esaki tin su motibo;  e cantidad di persona cu ta recupera di e virus ta relativamente halto pa dia tambe. For di comienso di luna e total di casonan activo tabata na 479 y esaki a sigui subi sistematicamente, cu a pone cu den apenas dos siman e la yega y pasa 1000 caso activo atrobe. Tabata riba dia 14 di augustus cu el a frena diripiente na 1151 caso, y despues a cuminsa baha, djey ‘schommel entre 1026 y awe cu e ta 1076. Pues e no a sigui subi cu 100 cada bez, evitando cu nos lo a yega 2000 mas liher, danki na e grado di ‘recuperacion’. Esaki no ta haci e situacion menos bon, pasobra hospital si e situacion a sigui subi. 

HOSPITAL

Hospital a cuminsa e luna cu 10 pashent hospitalisa pa Covid19 y a sigui bula bay halto pa un siman y yega te 23 caso. Aki el a pega pa 3 dia y despues dia 8 di augustus a ‘explota’ atrobe y pa casi un siman a sigui subi yega te 54 caso hospitalisa, pa despues baha dos dia y awor a subi e siman aki atrobe y yega te 70 caso hospitalisa. Tene na cuenta cu algun di nan ta casonan cu ta hospitalisa na Colombia, pero ta registra como pashent di Aruba registra ‘den un hospital’.