Debi na medida di CDC, por spera miles di turista menos pa Aruba

ORANJESTAD – E medida impone pa CDC di Merca pa turistanan no biaha pa Aruba debi na e grado halto di contagio di Covid19, a pone cu den apenas un siman, por spera entre 5.000 pa 10.000 turista menos na Aruba. Y segun e directora di ATA Ronella Croes, mester imagina cu si esaki mester tuma lugar cada siman, esta reduccion di e cantidad aki. Sra Croes tabata enfatico den su presentacion diaranson, cu ‘e tendencia aki no por continua!’. “E ta algo basicamente cu nos no por carga” Croes a sigui bisa, refiriendo na e economia di Aruba pa loke ta turismo. 

SITUACION

Segun Croes, manera anticipa, asina cu CDC a impone e medida aki, Aruba a cuminsa sinti e efecto aki. Y Merca a impone e medida aki, debi cu Aruba ta den pleno ola di contagio hopi halto aworaki, cu ta bira e ola #4. Y e ola, ta bin grandemente door di hende cu no a vacuna. Pues eynan ta unda cu sra Croes a haci un yamada dramatico riba comunidad, pa un rato no pensa riba bo mes, si bo kier vacuna of no, pero pa pensa riba e interes general. Si turistanan stop di bin Aruba, hende ta perde trabou, y esaki por ta abo tambe y bo famia. Pues Aruba lo sinti e efecto sigur. De hecho, a mustra con dramatico den apenas un siman di tempo, mester a ahusta e pronostico di bishitante. Ta premira cu e situacion lo por continua asina den September y October y ta te na November por spera un tipo di recuperacion atrobe.