ATIA: Satisfecho cu e precupacionnan a wordo reconoci pa IMF

ORANJESTAD –Atia su mensahe na gobierno awe tabata simple: ‘Enfoca riba recomendacionnan di IMF y esaki lo duna e gobierno credibilidad y lo recupera nos economia’.E gremio comercial Aruba Trade and Industry Association (ATIA) a duna su reaccion riba e nota di e conclusion preliminar di IMF. ATIA tambe a reuni cu team di IMF y por lo general ATIA ta satisfecho cu e preocupacionnan a wordo reconoci pa IMF. Algun ehempel ta punto 11, 12, 13 den e rapport caminda ta menciona e rigidez di nos mercado laboral, un punto cu ya pa algun tempo caba ATIA ta pidi atencion pe.

REFORMANAN NECESARIO:

Según ATIA, ta importante pa menciona cu gobierno di Aruba a sa di realisa varios cambio structural den fondonan di AOV y APFA cualnan pa aña a wordo ignora. Ainda tin varios punto cu mester wordo trata manera entre otro nos debe nacional y reforma organisacion di gobierno mes, paso no por sigui fia placa sin pensa con pa paga bek e debe cu ta sigui crece. ATIA ta spera cu esaki wordo atendi awo pa asina por trece e presupuesto den balans.

REFORMA FISCAL

ATIA tambe a tuma nota di e reforma fiscal cu ta wordo menciona y unda IMF un biaha mas ta recomenda un movecion di impuesto directo pa uno indirecto, algo cu ATIA tambe ta boga pe pa varios aña caba. Un cambio cu lo por trece miho control di entrada pa gobierno pero tambe asina elimina diferente impuesto anticua cu tin y trece mas placa den cartera di cada habitante na Aruba. Esaki alabes lo stimula crecemento economico. Ta importante pa gobierno realisa e reformanan necesario y crea un ambiente cu ta apto pa inversion na Aruba. Limita burocracia y facilita comercio.

FLEXIBILISA MERCADO LABORAL:

Un mercado laboral mas flexibel lo percura pa comercio haya mas espacio pa haci negoshi; lo engrandece e oportunidad pa crea mas cupo di trabou y lo facilita comercio pa tuma hende mas lihe den servicio.

Actualmente nos leynan laboral no ta facilita esaki, al contrario: e leynan ta haci’e dificil pa tin un bon maneho di personal. IMF ta constata cu e crecemento economico ta bay slow paso productividad economico no ta den ekilibrio cu e gastonan. "The cost of doing business" na Aruba ta halto. Tambe por menciona cu e impuestonan social cu e comerciante ta carga a yega na un nivel cu ta stroba pa tuma personal den servicio. E impuestonan social ta mas o menos 25% di e salario, y no tin bista cu e procentahe halto aki lo baha. Ta trata di gastonan di personal cu e comerciante tin cu cubri manera: pensioen obligatorio, prima social pa fondonan di AOV, AZV, seguro di accidente y di malesa. ATIA ta sostene e sistema social di Aruba pero no mester laga e sistema desaroya sin mas cu e consecuencia cu nos sistema social ta bira impagabel y ta stroba desaroyo economico di nos pais.   

PRODUCTIVIDAD LABORAL

E gremio ta mustra tambe cu nos leynan laboral cu ta riguroso ta bay a costo di productividad laboral y no ta stimula empleo. Por ehempel un trahador cu no ta funciona den su trabou of cu ta comete actonan ilegal no por wordo kita asina facil for di trabou, hasta si tin prueba fiho contra di dje. Duna sancion of coregi  actitud indesea ta hopi dificil.  No por haci cambionan necesario den e compania pa sobrevivi sin e aprobacion di e trahador, ta un keho y preocupacion cu ta biba bou comercio. Awendia e clase trahador ta disfruta di bastante proteccion, cual ta bay a costo di productividad. Tin cu remarca cu proteccion di interes di comercio, cual ta continuidad den haci negoshi, no tur ora ta haya su debido atencion. Continuidad den haci negoshi ta crucial pa nos economia sino comercio no por garantisa trabou den futuro. Sin negoshi no tin trahador y vice versa. Pa es motibo ta necesario pa tin un miho balans den nos leynan laboral cu lo facilita tanto e clase trahador como comercio. Actualmente e balans ta ‘off’.