Crisis Team: Grupo di local no vacuna ta representa 82% di hospitalisacion

ORANJESTAD -  Mientras e cifrasnan di vacunacion ta sigui subi na Aruba, e cifras di esnan no-vacuna ta sigui baha. Asina un informacion di Crisis Team di Aruba ta raporta diaranson. Segun e data ta ilustra cu apesar cu e grupo di localnan no vacuna ta representa solamente 29 % di e poblacion 18+, toch nos ta mira cu e grupo aki ta representa 82%, 87% y 77% di hospitalisacion, ICU y morto, respectativamente, pa motibo di Covid-19 severo desde e comienso di e di 4 ola (despues di 1 juli).  

POBLACION DI ARUBA

Aruba su poblacion ta consisti di un poblacion di ≈125 mil ciudadano teniendo na cuenta cu e grupo di esnan indocumenta. Na e momentonan aki na Aruba ≈58 mil ciudadano registra na Aruba entre edad di 18 aña bai ariba a vacuna cu tur dos shot, grupo di esnan cu ta ariba di 18 aña cu no a vacuna ta ≈23 mil. Si tuma nota, e grupo di esnan vacuna ta casi 3 biaha mas grandi cu e grupo no vacuna.  E informacion aki ta uno hopi importante cu no por descarta ora di analisa cifrasnan di COVID como cu e populacion na Aruba di esnan vacuna vs esnan no-vacuna no ta igual dus no ta 50/50. 

AUMENTO DI CASO POSITIVO

Na Aruba for di 1 di juli 2021 nos a conoce un aumento di 2238 caso positivo di COVID-19 bou di residente di Aruba cu AZV. E cifras aki ta consisti di 783 caso nobo bou di e grupo vacuna y 1345 bou e grupo no-vacuna. Manera por observa apesar cu e grupo di esnan vacuna ta 3x mas cu esnan no-vacuna, asina mes e cantidad di contagio bou di e grupo di esnan vacuna ta menos cu di e grupo no-vacuna. 

CASONAN INTERNA DEN HOSPITAL

Pa locual ta cifras di esnan cu a wordo interna den hospital por señala cu desde 1 di juli un total di 116 persona (18+ local) a wordo interna den hospital. Di esnan interna 21 tawata tin 1 of mas vacuna y 94 no tawata vacuna. Esaki ta traduci na un chens di 11 biaha mas grandi pa wordo interna na hospital pa motibo di Covid-19 si no ta vacuna. Di esnan interna cu mester a wordo interna den ICU, 2 tawata vacuna cu por lo menos 1 vacuna y 13 no tawata vacuna. Esaki ta traduci na un chens di 16 biaha mas grandi pa wordo interna den ICU pa motibo di Covid-19 si no ta vacuna. 

ESNAN CU A FAYECE

Lamentablemente 14, di cual 13 ta local, persona a fayece desde 1 di juli di cual 3 tawata vacuna y 10 no tawata vacuna. Esaki ta nifica cu e chens pa muri dor di Covid-19 ta 8 biaha mas grandi pa esnan no vacuna. 

DI CUATER WAVE

Na Aruba, pa motibo cu nos ta biba poblacion mas chikito y cu nos ta na comienso di e 4 wave di Covid-19 na Aruba, e number nan aki por cambia. Pero, si ta observa e number nan aki den exterior, ta mustra cu e vacuna Pfizer ta hopi efectivo den preveni Covid-19 severo. Esaki ta un bista di e cifrasnan di COVID na Aruba den e ultimo luna segun Crisis Team, y con esaki ta dividi entre e categorianan di esnan vacuna y esnan no-vacuna.