Ex minister Croes ta dilanti huez fin di luna pa apelacion den caso Ibis

ORANJESTAD – Ex minister Paul Croes y su señora Melony lo ta dilanti mesa berde atrobe dia 30 di augustus proximo pa tratamento di e apelacion di caso Ibis. Segun abogado mr Demis Illis, Corte a reserva 4 dia pa e caso aki (30 augustus pa 2 di September 2021). Casi dos aña y mey despues cu sr Croes a keda sentencia na 4 aña di castigo di prizon, su abogadonan mr Demis Ellis y Peppie Sulvaran (abogado nobo di Corsou) lo wak si e biaha aki por saca nan cliente liber. Fuera di e pareha Croes, lo tin 4 otro persona cu lo apela nan sentencia, sea nan mes of door di ministerio publico. 

E CASO

Tabata na februari di 2019 cu Corte di prome instancia a sentencia Croes y su casa, ambos cu sentencianan menos cu ministerio publico a pidi, (a pidi 5 aña pa sr Croes y 240 ora di trabou comunitario, pero a haya 4 aña pa Croes y 120 ora di trabou comunitario pa su casa). Como tal ministerio publico a apela e sentencia aki y e abogadonan tambe. Pa ambos, e abogadonan a pidi absolucion. 

OTRO SOSPECHOSONAN

Den e caso di e otro 4 sospechosonan, 3 a haya absolucion completo esta R. Martinus, N. Nuñez,  y R. Di Vecchia, pa cual ministerio publico a apela, mientras cu pa uno, J. Wever cu a haya un multa di 5 mil florin, tambe ministerio publico a apela. 

CASO IBIS

E caso Ibis ta relata iregularidadnan rond di dunamento di permiso of ontheffing di esaki, pa faborece otro persona. Den e caso specifico aki, e acusacion contra e ex mandatario tabata e.o. abuso di poder como mandatario den funcion, malversacion, labamento di placa y emplea un hende indocumenta na su cas. Despues di un entrada hudicial na su cas na casi comienso di 2017, tabata na augustus di 2017 cu a detene e ex mandatario, cu a sinta 3 luna den prizon den arestro preventivo, pa despues recobra su libertad dia 14 di November di e aña ey. Dos aña despues na januari di 2019, e caso mes a inicia. Y na februari di e mesun aña, huez a dicta e sentencia den tur e 23 sospechosonan, incluyendo e ex mandatario y su casa. Notable ta cu e abogado renombra di Corsou Marije Vaders e biaha aki a keda reemplaza pa abogado Peppie Sulvaran, tambe di Corsou.