Oduber sorprendi cu reaccion di Camara di Comercio riba San Nicolas

ORANJESTAD – Minister di Turismo Otmar Oduber a keda sorprendi cu Camara di Comercio su reaccion di ayera, referente e dos centronan comercial na San Nicolas y e proyecto hotelero, specifico Bahia Principe. Oduber, durante un conferencia di prensa awe mainta riba pregunta di prensa riba e topico, a bisa cu e lo a spera mas agresividad di parti di Camara di Comercio. Sigur relaciona cu e proyecto di Bahia Principe Don Pablo Collection na San Nicolas. “Esaki mirando cu ta trata di un proyecto cu lo crea un ripple effect pa economia di pariba di nos isla”.

KICO ANTO

E mandatario a bisa, -citando un bon amigo di su partido, Watty Vos, q.e.p.d.-, cu ‘para pafor di ring pa wak dos hende boxea y golpea otro hopi biaha ta mustra cu bo ta mihor boxeador cu e dosnan cu ta den ring’. Ora cu Oduber a tende e comentario di Camara di Comercio, lo a indica cu nan tin sentimentonan mixto tocante un hotel pa San Nicolas, e mandatario a puntra “Kico anto? Kico anto San Nicolas si merece?”. El a indica cu el a spera pa hopi aña cu Camara di Comercio lo a braza un proyecto cu lo por trece un desaroyo pa San Nicolas y el a kere cu nan lo yuda den e proceso di prepara e forza laboral manera ATIA ta haciendo awor aki.

SPIN OFF

Ademas, Oduber a spera cu Camara di Comercio lo a mira con un proyecto asina lo por crea mas oportunidadnan pa su mesun miembronan, mirando e spin off effect cu esaki lo por tin cune na San Nicolas mes. Tambe e mandatario a spera di Camara di Comercio cu lo a encurasha su miembronan y bisa cu awor por fin ta bay bin un desaroyo pa pariba di nos isla y pa nan habri un negoshi na San Nicolas. Tambe enfoca riba e regimen fiscal preferencial cu tin pa e area aki.

DESEMPLEO

Awor cu tin un proyecto cla pa cuminsa, en bes di brase cu dos man y mira con por crea tur e spinof rond di dje, ta pensa riba algo cu por sosode aki 4 pa 8 aña, esta e desaroyo di e tereno di e refineria. Proyecto cu Minister Otmar Oduber ta sostene tambe, pero e no ta algo cu por tuma lugar di biaha, contrario na e desaroyo di e hotel. Den e cuadro aki Minister Oduber ta puntra Camara di Comercio kico ta asina robez cu tin 8% di desempleo na Aruba, ta crea un desaroyo na un parti di nos isla cu ta desaloha na e momentonan aki y no tin nada ta tuma lugar?

ALL INCLUSIVE

Bayendo riba e tereno di all inclusive, Minister Oduber a bisa cu tin estudionan cu posiblemente ta bay termina den leynan pa evita cu nos destinacion ta bira uno di all inclusive. “Mi ta e prome cu a sali papia riba esaki, no awe sino tempo cu AHATA a bisa publicamente di ta den desacuerdo cumi. Nos tin e estudio den su di dos fase caba, pasobra a pesar cu e trend mundial ta pa bay den direccion di all inclusive, mi ta sigui kere cu Aruba, cu e tamaño cu nos tin, cu e cantidad di inventario di camber cu nos tin, nos mester keda un destinacion unico”.

SHOPPING MALL

E mandatario a sigura cu ningun momento e ta kere cu lo tin un problema pa tin dos shoppingmall, ya cu uno lo no stroba e otro. Esnan cu ta shop na e hotel, lo haci esey eynan y despues bin e centro. Esnan cu ta shop den e centro, lo keda shop eynan pues no ta mira ningun problema. De hecho ta considera cu tin pa tur hende.