Comerciantenan Uni: Gobierno mester evalua ciencia medico y consulta cu comercio pa cu maneho di Covid19

ORANJESTAD - Comerciante Uni di Aruba (CUA) ta urgi gobierno pa evalua y actua siguiendo e recomendacion di ciencia medico, ademas di estadistica y consulta cu comercio pa asina e decisionnan por tin un efecto optimal y preventivo. Asina e gremio aki a bisa diamars den un comunicado pa gobierno riba su maneho di Covid19. 

CADA NEGOSHI TA DIFERENTE 

CUA ta bisa cu nan ta reconoce cu cada negoshi ta diferente y pesey ta keda na cada directiva pa determina e miho manera pa atende cu e tema aki den nan caso specifico. Aruba tin leynan laboral cu ta brinda proteccion tanto pa e trahado, como pa e dunado di trabou. E leynan aki ta vigente y cualkier paso cu tuma mester ta conforme nan. “ Ta keda na cada dunado di trabou pa proteha nan negoshi y esnan cu ta traha y bishita esaki di e consecuencia potencialmente mortal di un empleado individual. Tin poco diferencia entre expone un colega na un virus cu por causa su morto y e comportacion iresponsabel cu ekipo of material di trabou cu por trece su bida na peliger” e gremio ta sigui bisa. Ademas, segun CUA, den derecho laboral ta prohibi y por ta motibo pa pidi haya retiro aproba den corte of departamento di labor, pa intencionalmente expone colega na peliger di morto.  Den ambos caso, e por tin un consecuencial fatal door di e accion robes di un empleado.

TA NA GOBIERNO PA TUMA MEDIDA

“ Ta na gobierno pa tuma medida legal pa proteha bida di hende y nos economia den e pandemia aki; tambe pa motiva e prevencion di contagio y hisa e indice di vacunacion. Comerciante Uni ta sostene e esfuersonan cu por evita un mayor perdida innecesario di bida humano, e deterioro di nos servicionan medico y reduccion di actividad economico cu lo ta devastador pa nos pais” e gremio ta sigui bisa finalmente. Pa lesa e preocupacion completo di CUA, por click AKI.