Te cu awe AZV a manda 13 pashent di Covid19 pa Colombia

ORANJESTAD – E cantidad di pashent cu Covid19 cu a keda traslada pa Colombia,- incluyendo esun di awe mainta -, a aumenta te na 13. Director di AZV Edwin Jacobs a confirma na noticiacla cu ayera merdia ainda e cantidad tabata 11. Ya awe mainta un pashent mas a biaha pa Bucaramanga, y e total tabata 13 y asina e lo por sigui subi. Segun sr Jacobs, ta mandando hendenan primordialmente pa Bogota y Bucaramanga. Pero ta yega un momento cu esaki ta yena y tin aworaki e cuidad di Baranquilla como backup pa manda pashent.

AUMENTA CAPACIDAD

Mientrastanto sr Jacobs a splica tambe cu yegada di e ekipo medico for di Merca di AMI, ta pone cu por expande e capacidad di departamento di Cuido Intensivo (ICU) di 10 cama pa mas. Esaki pasobra cada cama ta rekeri personal extra. Aruba tabatin e camanan, pero no personal y sin personal ta mescos cu bo no tin cama. No ta conoci si e personal cu a yega diadomingo segun declaracion di minister Dangui Oduber, ta cla pa traha y si a logra aumenta e capacidad caba. NOTA: E potret ta di pashent di Covid19 awe mainta cu a keda hospitalisa na HOH.