Conocido ciudadano Grace Maduro a bay sosega

ORANJESTAD – Dialuna anochi Noticiacla a ricibi e tristo noticia cu conocido ciudadano di Aruba Grace Maduro (61) a bay sosega dialuna anochi mes na su cas. Grace Maduro a perde e bataya contra cancer di pulmon. E la yega di gana e prome bataya, pero despues e cancer a bin bek mas duro, y e biaha aki, e no a logra vence esaki. Grace tabata un persona sumamente versatil y activo durante su bida. Te na ultimo e tabata carga un cantidad di funcion importante, manera project leider di Sociaal Crisis Plan, Safety code, y a ocupa un funcion halto na Corte di Husticia, como presidente di Directiva di Conseho di administracion di Tribunal Comun di Husticia, cual funcion el a tene pa 10 anja y a retira di esaki na mei ultimo. Den comercio hunto cu su ex casa a maneha Fantastic Gardens pa hopi anja. Tambe e tabata HR Manager di Horacio Oduber Hospital entre 1994 y 2008. Un di su ultimo funcionan tabata presidente di Stichting Leerorkest Aruba cual funcion el a asumi na december di 2019 te na ultimo.E tabata forma parti inicial di 11 ruman, di cual a keda 6 na bida. Entre su rumanan conoci, tin e conocido Hubert Maduro, ex presidente di Conseho Electoral, y Leo Maduro, actual hefe di redaccion di BonDia Aruba. Noticiacla ta manda palabra di condolencia na famia di Grace. Cu Grace sosega na paz.