Cuerpo Policial Aruba awe ta celebra su 35 aniversario

MACUARIMA – Awe Dialuna 16 augustus 2021 Cuerpo Policial Aruba ta celebra su 35 aniversario. Desde cu Aruba a haya su Status Aparte, Cuerpo Policial Aruba a wordo funda. E tempo ey a cuminsa cu menos di 200 polis. Mayoria polis tabata di nos ruman antiyas. Den feliz memoria ex-altocomisario di Polis Sr. Ronald. W. Peterson tabata tin e tarea pa forma polis, forma un cuerpo den un etapa nobo como pais autonomo den Reino Hulandes.

For di e tempo ey Aruba a conoce su prome agentenan femenino cu tabata Sra. Marlen de Cuba-Giel y Sra. Gerda Williams. Alavez a conoce e prome wardanan di polis cu ta di Oranjestad cu a wordo traha na unda ta awe Renaissance Hotel y warda di Polis San Nicolas. Ambos tabata e wardanan oficial despues di 1986. For di e tempo ey Cuerpo Policial Aruba a mehora, a expande, a conoce cambio y e organisacion a bira mas grandi. Cu trabou duro nos por mira for di unda KPA a cuminsa, con ela gatia y unda nos ta mira nos mes pa futuro.

Awendia nos por conta cu mas o menos 600 polis y personal administrativo trahando. Ta trata aki di hende homber y muhernan trahando den 4 districto, cu ta warda di Polis situa na Oranjestad, Noord, San Nicolas y Santa Cruz. Nos tin pa prome biaha den historia di Aruba e prome altocomisario femenino cu ta Sra. Vanessa Tjon-Kock.

Durante aña nos por conta cu diferente unidadnan special cu ta forma parti di e organisacion manera: Unidad motorisa, Unidad Canino, Team di aresto, Mobiele Eenheid, Duik Team, Kust surveillance, Helicopter unit, Surveillance y sin lubida e departamentonan conoci di recherche cu ta entrena y capacita pa investiga y soluciona  casonan mas complica.