ODUBER: Gobierno di Aruba tin atencion riba asunto venezolano di espacio aereo

ORANJESTAD – Gobierno di Aruba a tuma nota di e expresion di presidente Venezuela Nicolas Maduro riba ‘toma di espacio aereo’ y ‘ta atende cu esaki na nivel diplomatico’. Minister encarga cu transporte Otmar Oduber awe mainta a recorda tur hende cu Aruba ta cay den e asina yama Curacao FIR 'Flight Information Region', cu su centro na Corsou. “Nos no ta precupa pa e trafico aereo cu ta den e Curacao FIR resorta bou di Reino. Tin tratado internacional pa con esaki ta wordo maneha”. Segun e mandatario, oficialmente no a tende nada for di Reino Hulandes. Ta tuma tur esaki na serio y cu e cautela necesario. Y pa mas informacion a referi na premier Eman pa e parti mas diplomatico.

NICOLAS MADURO

Presidente venezolano Nicolas Maduro ta bisa cu Venezuela tin e derecho pa defende su mes den e espacio aereo cu ta inclui e islanan ‘Antiano’,  Aruba, Bonaire y Corsou y tambe St Maarten. E matutino di Corsou, -Extra- , a raporta esaki diaranson den su edicion. Segun e matutino, Maduro a bisa esaki den un discurso nacional na television. Mas specifico, cu ‘e zonanan defensivo di e pais, a wordo expandi pasando islanan ABC y St Maarten’. E paso aki lo a wordo tuma despues di e intento di golpi di estado luna pasa. Segun e discurso di e presidente, posibel golpistanan lo a intenta di bombardea e palacio presidencial Miraflores y algun otro edificio. E la informa tambe cu e la informa Den Haag riba e asunto aki. Esey sinembargo no a keda confirma pa autoridad hulandes.

SOSTEN PA MADURO

Mientrastanto manera cu NoticiaCla.com a raporta caba e siman aki, awe nochi, venezolanonan residencia na Aruba cu ta simpatisa nan gobierno, lo demostra esaki publicamente e siman aki. NoticiaCla.com a haya confirmacion di parti di consulado di Venezuela awe mainta, cu un grupo di habitante tin intencion pa sostene e gobierno, contra e reciente intento di golpi di estado cu tabatin na Venezuela. “Nos a wordo bisa cu nan kier bin demostra nan sosten y lo haci esaki diahuebs anochi awor”, e vocero di consulado a sigura NoticiaCla.com dialuna ultimo. No ta conoci exactamente den ki forma lo haci esaki, sino no mas ta kere cu ta trata di discursonan cu lo wordo duna e anochi ey, segun e vocero a laga sa.  

GOLPI FRUSTRA

Manera Noticiacla.com a raporta siman pasa, un posibel golpi di estado na Venezuela a keda frustra ayera, segun presidente di e pais Nicolas Maduro. For di ayera tin informacion circulando cu un grupo di disidente militar, -entre nan algun militar piloto-, tabatin intencion di derumba e gobierno actual, pero cu nan no a logra nan meta. Gobierno di un forma of otro, a sa di frustra esaki y desmantela e grupo y aresta gran mayoria di e grupo. E intencion tabata pa uza avionnan militar pa bombardia cierto lugarnan crucial, manera e plaza na Caracas, Palacio Miraflores y mas, creando un caos terible. “Nan a wordo asisti pa Merca” Maduro a sigura comunidad pa medio di e canal di estado. Mientrastanto un canal independiente na ingles, for di Caracas, a traha un raportahe mas neutral posible, describiendo henter e episodio. Por mira e raportahe aki. NOTA: E foto di archivo ta di e golpi di estado di 11 di april di 2002 ora cu a purba baha e tempo ey, presidente venezolano Hugo Chavez Frias.