Personal extra pa ICU di Aruba ta yega mayan for di Merca

ORANJESTAD – Diadomingo un grupo di enfermero specialisa pa ICU (Cuido Intensivo di hospital) di Expeditionary Healtcare, miho conoci como Aspen Medical International AMI, ta yega Aruba pa fortifica e personal di ICU na Aruba. Minister di salud demisionario Dangui Oduber a confirma esaki diasabra mainta pa noticiacla. Esaki ta e ayudo cu intermediacion di secretario di estado Hulandes Paul Blokhuis. No ta conoci ainda cuanto exactamente lo yega. Tabata na april di anja pasa cu un grupo di 21 persona a yega Aruba pa yuda ora cu Aruba a keda confronta cu e virus inicialmente. Pero debi na e hecho cu algun di nan a keda contagia, mester a retira full e grupo y nan a keda reemplasa despues cu un otro grupo. 

REFUERSO

Manera ta conoci, for di e siman aki hospital a bati alarma y e director Jacco Vroegop a confirma pa noticiacla cu ICU tabata yen, y cu tabata falta personal. Tin cama di ICU pero sin personal y como tal diabierna mester a escala e situacion di hospital pa por a atende solamente casonan di Covid19. Cu e personal extra cu ta yega diadomingo, por expande e capacidad di ICU na Aruba, cu por nifica tambe cu menos pashent di Covid cu ta den ICU, lo mester wordo traslada eventualmente pa Colombia. Esaki ta un gasto hopi halto pa AZV  (24 mil florin pa buelo y 25 mil pa estadia pa cada pashent) cu no por sigui pa largo. NOTA: E potret ta di archivo di noticiacla di e prome biaha cu e grupo di AMI a yega Aruba na 2020 pa asisti personal di ICU e tempo ey na Aruba.