Jacobs: Cada pashent di Covid19 cu bay Colombia ta costa AZV 50 mil florin

ORANJESTAD – Cada pashent di Covid19 cu bay Colombia ta costa AZV 50 mil florin. Asina director di e organo, Edwin Jacobs a bisa noticiacla diabierna. Mientrastanto nan lo sigui manda pashent di Covid19 pa Colombia te ora cu no por mas, sea ta pa motibo financiero of cu no tin espacio mas na e pais Andino.   Prome minister Wever na su turno a bisa e portal aki un dia prome (diahuebs) cu e ta reza tur dia pa e momento no yega cu AZV tin cu informa un famia di un pashent cu e no por mande Colombia mas pasobra no tin placa, of no tin lugar. Y si tene cuenta cu awe so a manda of ta planea pa manda 4 pashent Colombia, esaki awe so a costa AZV 200 mil florin, sin conta e 6 nan cu a bay caba, cu ta 300 mil mas. 

MANDA PASHENT PA COLOMBIA

Manera ta conoci, for di algun tempo, AZV a cuminsa manda pashentnan cu tin Covid19 y ta den ICU (Cuido Intensivo di Hospital) pa Colombia, pa alivia e situacion na hospital. Financieramente e ta un gasto grandi extra, pasobra cada pashent cu bay Colombia ta costa por lo menos 50 mil florin pa pashent segun director. Y di e suma aki, 23 pa 24 mil ta bay pa e biahe so, esta pa paga e buelo di air ambulance so. E resto, 25 mil ‘laba laba’ ta pa e luna cu e pashent keda interna na Colombia te ora cu e recupera, pa despues e bin bek den avion comercial. 

CUANTO MAS AZV POR HACI ESAKI

Mientras cu sr Jacobs no por bisa con largo AZV por sigui haci esaki mirando e situacion financiero, el a bisa cu e problema mas grandi ta na Colombia mes, unda cu ta depende di e capacidad cu Colombia tin pa pashentnan di Aruba den ICU. Aruba lo sigui manda hende tanten cu financieramente por. Pero Colombia tambe por para cos mirando cu nan mes por haya nan mes cu problema di capacidad cu ta pone cu nan ta reserva e lugarnan di ICU solamente pa pashentnan Colombiano. E ora nos tin un problema. Loke tambe AZV ta hacienda ta purba combina biahenan pa Colombia, door di manda 2 pashent pareu pa asina scapa e gastonan di buelo. 

EVELYN WEVER

Segun prome minister Wever, e problema di AZV y e gastonan, y mas pio, e limitacion di fondo ta describe e problema den un palabra. E mandatario, riba pregunta di noticiacla, no por a bisa cuanto placa ainda AZV por gasta na manda pashent di Covid19 pa Colombia, y e director tampoco. Segun Wever, no tin tanto miyon of mil florin prepara pa e biahenan aki. “Mi ta spera y reza tur dia cu no yega e dia cu mi tin cu haya e yamada di AZV cu ta bisa cu akinan tin un pashent di Covid cu tin cu bay Colombia, pero nos no tin placa. Mi ta reza pa nunca esey tin cu pasa, cu nos tin cu nenga hende cuido, y laga hende muri, pasobra nos no tin placa” Wever a bisa. “Aworaki nos por stretch e, (pero) ta yega un momento cu no por sigui mas” e mandatario a bisa. E ta confia riba e sentido civico, di responsabilidad di nos ciudadanonan cu e no tin cu yega asina leu. Potret cortesia di Aruba.nu y ta un potret di archivo.