Van Zwol na Aruba atrobe pa logra un acuerdo cu Bermudez

ORANJESTAD – Den un otro intento, e ‘superambtenaar’ di gobierno Hulandes Richard van Zwol ta yega Aruba e siman aki atrobe. E biaha aki e lo reuni atrobe cu minister di finanza Angel Bermudez pa wak si e biaha aki si nan por haya otro riba e situacion di finanzas publico. Notable e biaha aki ta cu mientras cu NoticiaCla.com tin e informacion aki confirma, e resto di e informacion rond di su bishita, ta hermeticamente sera y ‘masha secreto’. E unico informacion cu tin ta cu van Zwol ta yega Aruba diahuebs, pero no sa cu ken, ni pa cuanto dia. Esaki por ta ‘bon’ of ‘menos bon’ dependiendo di e protagonistanan di e combersacion. Y pa evita posibel ‘mal interpretacion of aire publico’, lo a dicidi pa haci e bishita aki ‘aun mas low profile’ cu ta posibel.

 COMPLICACION OF NO

For di declaracion di e mandatario di finanza, -dos dia pasa ainda-, cos mester bay bon pasobra ‘ no tin hopi complicacion’. Sinembargo den e mesun rosea, ta di multiple biaha cu e ambtenaar ta topa e mandatario sin por haya otro. Manera NoticiaCla.com a splica caba awe, mientras cu Bermudez ta sigura cu no tin ‘hopi discrepancia’, toch partidonan no por a haya otro ainda. Pero lo ‘sigui te ora cu haya otro’. Mientras cu van Zwol ta purbando pa logra un acuerdo cu Bermudez e siman aki, trabounan riba e presupuesto ta continua. Bermudez a indica cu otro siman posiblemente e presupuesto lo mester bay Staten pa asina e wordo trata den su prome fase, pa despues sigui cu esaki y pa fin di luna, comienso di otro luna e keda cla. Van Zwol ta bin Aruba cu un mision, y e resultado di e reunion e siman aki ta di sumo importancia. NoticiaCla.com a compronde cu e resultado di e reunion aki ta determina kico lo sosode otro luna durante e proximo conseho di minister di Reino. "Tin hopi cos riba wega", a wordo bisa. 

ARUBA COMPARA CU GRECIA

Gobierno di Aruba ta compara su ‘negoshacion riba finanzas’ cu Hulanda awor, manera esun cu Grecia tin cu resto di Europa. Specificamente e minister di Finanza Angel Bermudez a bisa ayera, usando palabranan manera ‘supremacia’ y ‘arogancia’ pa demostra su punto na NoticiaCla.com. “E (Grecia) ta confrontando un supremacia, caminda e no ta haya oido pa su propio circumstancia cu e ta aden, pa e haya un adaptacion di e palabracion cu a wordo haci cune den pasado”. Segun Bermudez, “ta parse cu (ta e) mesun sentimento mi ta aden cada bez”. “Bo ta haya bo mes enfrenta cada bez contra un forma di supremacia y te hasta bo por yame arogancia”, e mandatario ta sigui bisa di e forma con Hulanda ta purba impone riba Aruba. “Pero pa ami, esey no ta importante. Ta e parti final ta conta. Keda insisti, y persevera y pa cierto momento yega na un comprondemento”. Asina e mandatario rapidamente ta cambia e tono inicial, for di uno ‘brabo’ pa uno mas suave, indicando cu no obstante tur e obstaculo, e ta mira cu lo tin un solucion na final toch.

REUNION CU VAN ZWOL

E mandatario a sigui y confirma cu enberdad e la reuni cu e superambtenaar Richard van Zwol recientemente na Hulanda, manera cu NoticiaCla.com a raporta den forma di primicia y practicamente exclusividad. A confirma cu e combersacionnan no a termina y cu e ta ‘den proceso di intercambia di pensamento’. E mandatario no kier a bay mucho den detaye cu si Hulanda y Aruba ta papiando ‘banda di otro’ y cu pesey no por ‘haya otro’ riba e tema di finanzas publico. Loke e mandatario a admiti ta mas bien cu Hulanda y Aruba ta den discusion encuanto e instituto pa supervisa finanzas publico.

IMPONE CFT 

Hulanda kier simplemente ‘impone’ CFT riba Aruba, pasobra ‘e la funciona pa Corsou y St Maarten’. E problema segun Bermudez, ta e ‘comprondemento riba igualdad cu Hulanda. “Nos mester yega na un otro base huridico (enves di esun cu Hulanda tin cu St Maarten y Corsou), pero di palabracion, con e tin cu funciona pa cubri nos propio interes”. E ta admiti cu Aruba a pidi pa ayudo, pero pa sa cu nos ta bayendo den e rumbo bon. Nada mas. “Nos no ta pidi ningun cen, pa ningun hende no bin impone nada riba nos”, implicando cu door di Aruba no a fia cen di Hulanda, Hulanda no tin nada di impone riba nos. Algo cu segun Bermudez, Hulanda ta purbando di haci ainda.

BON INTERCAMBIO

Den mesun rosea sinembargo toch, Bermudez ta sigura cu ‘no tin hopi discrepancia di opinion’. Ta intercambiando y e boluntad tey di ambos banda y ta kere cu lo ‘yega na dje’. Ta spera so, cu nada no wordo imponi pero a base di consenso y igualdad entre dos pais. Aruba no tin nada contra supervision, ya cu ta algo normal e internacional. Atrobe e ta uza e formula Troika, unda cu tres instancia ta controla otro, manera na Europa, banco central europeo, IMF y mercado comun europeo. Tur ta formanan cu e control y supervision mester por funciona.