Testigo di buelo: Tripulacion riba buelo tabata excepcional ora cu Arubiano a bira malo abordo

ORANJESTAD – E buelo riba cual e Arubiano Mayron Kock tabata diahuebs, a bira uno cu hopi pasahero lo no lubida. Un pasahero a comparti e loke a sosode abordo. E persona a confirma loke a wordo describi tambe, esta cu dado momento e Arubiano a cuminsa saca sanger teriblemente. “Despues mas pasahero tambe a cuminsa saca, pasobra nan no por a maneha e situacion”. 

TRIPULACION 

Loke a impresiona e pasahero aki, ta e forma con e tripulacion di e avion a maneha e situacion esta hopi profesional. Mester bisa cu mientras cu hopi ta kere cu e personal di cabina ta mas bien ‘sirvientanan den aire’, ta conoci cu e personal di cabina nan entrenamiento ta consisti di entre 70% pa 80% di situacion di emergencia y e resto ta pa ‘sirbi’ e pasaheronan abordo. Pues ora cu cosnan asina sosode, nan ta ‘prepara p’e’.  Tambe un dama den first class, a wordo considera como e heroe di e buelo, ora cu pa 30 minuut e la cuminsa duna e persona en cuestion esta Mayron Kock ayudo di CPR. 

BOLBE ARUBA

Unabez cu e incidente a tuma lugar, e capitan a opta pa bolbe Aruba pero mester a bula rond pa descarga gasoline pa por a haci un aterisahe safe. “Tabatin panico real riba e avion” e pasahero a sigui bisa. Tabatin te hasta dos pasahero cu tabata vigila e cockpit pasobra nan a kere inicialmente cu esaki tabata trata di un desviacion straño.  Mientrastanto manera ta conoci, e ciudadano di Aruba sr Kock a fayece awe marduga den hospital na Aruba a consecuencia di e situacion cu e tabata aden. Noticiacla ta manda palabra di condolencia na famia di e fayecido.